Qaqortumi ujajaasoqarpoq: Politiit takunnissamisunik ikiortissarsiorput
Ippassaq nalunaaqutaq 19.40-45 missaani, Qaqortumi Brugseneeqqami kiinarpalerluni ujajaasoqarpoq, ujajaasoqarsimanera Nunatta politiivinit misissorneqarpoq.
Angut kiinarpaqartoq savilersorluni, pisiniarfimmi sulisunut qunusaaraluni aningaasanik piumasivoq, ujajaasorlu taamaalioreerluni pisiniarfimmiit anisimavoq.
Tillinniarsimasoq politiinit ujarneqarpoq, sulili tingusarinnittoqarsimanngilaq, nunatta politiivisa pigaartuisa pisortaat, Jørgen Madsen paasissutissiivoq
Qaqortumi politiit tillinniartoqarnerata nalaani, pisoqarfimmi takunnissimasoqarpat innuttaasunut ikioqqupput.
Pinerlussimasimasoq 160-170 cm missaanni angissuseqarpoq, qernertumik kavaajalik qaqortortaqalaatumik, iluatigut nasaasartalimmik tujuuloqarluni qernertunillu qarleqarpoq.
Pisullu taassuma saniatigut, unnuaq imigassartorsimanermut attuussuteqartunik suliaqarfiuvoq, imigassamullu attuumassuteqartunik tingusarinninnerpaaluit pisimapput.
Imigassartorsimatilluni biilertoq angut 20-it missaanni ukiulik, Nuummi tingusarineqartunut ilaavoq.
Pineqartoq biilinik ajutoorsimavoq, biilillu allat uninngasut aporsimallugit, taamaakkaluartoq inunnik aqqunartoqarsimanngilaq, politiit taama paasissutissiipput.
