Inuussutissarsiornikkut nittarsaassinerat: Qaqortumi suliffeqarfik Danmarkimi tuniniaasussarsiortoq

Qaqortumi suliffeqarfimmik Inua Caremik piginnittut Danmarkimi tuniniaasartunut isumaqatigiissuteqarsinnaanissartik neriuutigalugu Kalaallit inuussutissarsiornikkut nittarsaassinerat Aarhusimi pisoq pingasunngornermi peqataaffigaat.

Suliffeqarfik naasut nunatsinneersut atorlugit pinnersaatinik akoorutitaqanngitsunik nioqquteqarpoq, tamakkununngalu Danmarkimi niuerfissaqarpoq.
Piginneqataasoq Pipaluk Silassen taama oqaluttuarpoq.

- Pisiniarfeeqqani, pinnersaasarfinni nujaleriffinnilu tuniniaasinnaanissarput neriuutigaarput. Nioqqutitta, kikkuunitta suminngaanneernittalu taakkunani oqaluttuarineqarnissaat kissaatigaarput.

AAMMA ATUARUK Pilersitsineq ilinniartitsissutaalissasoq

Kalaallit Illuutaat Aarhusimiittoq nittarsaassinermik aaqqissuisuuvoq. Kalaallit suliffeqarfinnik aallartisaasut nioqqutiminnik nittarsaasinissaminnut, suleqatissanut attaveqalernissamut niuernikkullu ineriartornermut siunnersorneqarnissaminnut tassani periarfissinneqarput.

Siunnersorneqarluarnissarlu Inua Caremik piginnittunit kissaatigineqarpoq. Qaqortumi suliffeqarfiutiminni pingasunik sulisoqareeraluarlutik marluinnaallutik nutaanik periarfissarsiortarput, piginnittup aappaa Anne Mette Nielsen oqaluttuarpoq.

- Inussutissarsiornikkut suliaqartunik takkuttoqarnissaa neriuutigaarput. Suliffeqarfimmik aallarnisaasunik uatsitut ittunik ikiuerusuttunik. Siunnersuillutillu ilitsersuisinnaasut. Marluinnaagatta tamanna pisariaqartipparput, Anne Mette Nielsen oqarpoq.

Suliffeqarfiit suliaqarfiillu nutaat tapersersornerisigut nunatta aningaasaqarnerata siuarsarneqarnissaa politikerit inuussutissarsiornikkullu suliaqartut isumaqatigiissutaat.

AAMMA ATUARUK Siulersuisunngortut aallarnisaasut amerlanerulernissaannut aqqutissiuissasut

Pipaluk Silassen Anne Mette Nielsenilu nunatsinni ikiorluarneqarsimallutik misigisimapput, ilaatigut Greenland Businessimit. Danmarkimili niuerfik imaaliallaannarluni iserfigineqarsinnaanngilaq, pingaartumik aqqutissat pissutigalugit, Anne Mette Nielsen oqarpoq.

- Uagut Qaqortumi najugaqartugut isumaqarpugut ineriartorneq killormut ingerlasoq (..). Angalaneq akisuupilussuuvoq, taamaammat allamukarnissaq unammillernartuuvoq, aallarlunimi inuit naapillugit oqaloqatigineqartariaqarput. Pisisartussavummi tassani nassaariniartussaavagut, Anne Mette Nielsen oqarpoq.

Pipaluk Silassenilu aperineqarami Inuit Carep ukiut qulit qaangiuppata sumut killissimanissaa qanoq takorloorneraa, akissutaa ersarippoq:
- Isumaqarpunga ukiut qulit qaangiuppata – Qaqortoq eqqarsaatigineqaraangat ingerlaannaq ima eqqarsartoqartassasoq: Tassa Inua Carep angerlarsimaffia.

AAMMA ATUARUK Qaqortumi mittarfiliornissap suli attanneqarnera Kielsenip naqissuseraa