Qaqortumi mersortarfimmi suliat aallarteqqinneqalersut
Tikeraanut ingerlatsiviliorlunilu tassannga ingerlatsineq kiffartuussinissamik isumaqatigiissummiippoq, nunattalu oqaluttuarisaanerani ullutsinnullu tunngasunik puisinniartarnermik paasisitsiniaanermik suliaqassalluni, takornarianullu tunngatitanik puisit amiinik tunisassialiortumik sannaviup suliaqartup ingerlanneqarnissaa siunniunneqarluni:
- Puisit amiinik pilerisaarinermut pingaarutilittut ilaasoq tassaavoq nunatsinni ullutsinni kulturimut puisinniarnerup aamma pingaarutilittut ilaanera, puisip neqaata nerisani annertuumik ilaanera, piniagaanerat piujuartitsisuusoq, aammalu nunatsinni kalaallit kulturianni puisit amiata suli annertuumik pingaaruteqartuunera, Vittus Qujaukitsoq, tusagassiuutinut nalunaarummi taama ilaatigut oqarpoq.
Takornariat ukiumut 500-t tikillugit Great Greenlandip ammeriviani mersortarfianilu takornariartitsiviup nassuiaassilluni takornariartitsisarnerani takornariartinneqartarput.
Great Greenlandip takornarianit orninneqarsinnaanissaa Naalakkersuisut pingaarutilittut nalilerpaat, takornarianullu nuannaarutissatut suliap attatiinnarneqarnisssaa pingaaruteqartutut nalilerneqarluni.
Takornarianut tunisassianik sanaartornerit, soorlu aaqqatinik, isersimmatinik tammajuitsussanillu minnerusunik Great Greenlandip nioqqutissiaanik suliaqarnermit mersortarfiup sammisarilissavai.
