Biilit misissorneqartarnerannut nutaamik systemitaarnissaq isumaliutigigaat
Danmarkimi oqartussat Nunatsinni biilit misissorneqartarnerannut akisussaasuusut, biilinik aalajangersimasumik akuttussusilimmik misissuinerat kingulleq 1999-imi ingerlanneqarpoq - ukiut 19-it matuma siorna. Biilit ukiunit sisamanit pisoqaanerusut, Danmarkimi malerugassat naapertorlugit, ikinnerpaamik ukioq allortarlugu teknikkikkut akornuteqarnerinik misissorneqartartussaagaluartut taama pisoqarpoq.
AAMMA ATUARUK Biilit ukiuni 18-ini misissorneqarsimanngitsut
Danskilli assartuussinermut ministeriata Nunatsinni biilit teknikkikkut isumannaatsuunissaat qanoq qulakkeerneqassanersoq Namminersorlutik Oqartussanit aalajangiiffigineqartussanngortippaa.
- Kalaallit Nunaanni naalakkersuisoqarfimmut nalunaarutigaarput biilinik misissuinermut systemimik Kalaallit Nunaanni isumaqatigiissutigineqarsinnaasumik eqqussisoqariarpat inatsisisassatut siunnersuummik suliaqarnissamut saqqummiussinissamullu ikiuukkumalluta, danskit assartuussinermut ministeriat Ole Birk Olesen (LA) Folketingip Kalaallit Nunaannut tunngasunut ataatsimiititaliaanut juulli sioqqutilaarlugu akissuteqarluni taama allappoq.
Iluarsaassisarfiit akornanni unammilleqatigiittoqanngitsoq
Nunatta isorartunera iluarsaassisarfiillu illoqarfiit anginerit Nuup, Sisimiut Ilulissallu avataanniittut ikitsuinnaaneri ajornartorsiutaasimasoq, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik KNR-imut akissutimini arlalinni taama inerniliivoq.
Biilinik misissuisarnerup namminersortunngorsarneqarnissaa Folketingimit 2004-mi aalajangerneqarpoq, mekanikerit namminersortut maleruagassat quppernernik 800-nik annertutigisut tunngavigalugit biilinik misissuinissamut akuerineqarsinnaanngorlugit. Aaqqissuussineq taanna Nunatsinnut atuutsinneqanngilaq.
Danmarkimi biiliutillit ataasiakkaat iluarsaassisarfik sorleq atorusunnerlugu nammineq aalajangersinnaavaat.
AAMMA ATUARUK Bremset ajoqutillit atuinnarsinnaajunnaarpatit
Nunatsinnili iluarsaassisarfinnik amigaateqartoqarnera pissutigalugu taamatut aaqqissuussineq attuumassuteqarpallaarnermik ajornartorsiutinik pilersitsisinnaanera qanippallaartoq, naalakkersuisoqarfik taama naliliivoq.
Mekanikerermi biilit teknikkikkut akornuteqarnerinik paasisaqartoq akornutaasunik iluarsaassisinnaasut illoqarfimmi nunaqarfimmiluunniit kisiartareratarsinnaavaat - iluarsaassinermullu aki nammineerluni aalajangerlugu.
Taamaattoqarneranilu innuttaasut eqqugaassapput, pingaartumik inoqarfinni mikinerusuniittut, naalakkersuisoqarfik taama erseqqissaavoq.
AAMMA ATUARUK Bilsyn nærmer sig
Taamaammat Namminersorlutik Oqartussat aaqqissuussinermik assigiinngisitaakkamik nunatta isorartuneranut naleqqussakkamik kiisalu sumiiffinnut aqqusinikkut angallaffiuvallaanngitsunut maleruagassanik piuminarsakkanik imalimmik siunnersuuteqarnissaq isumaliutigaat.
Kikkulli misissuissanersut qanorlu akulikitsigisumik misissuisoqartassanersoq suli nalunarpoq.
Aamma naalakkersuisuusimasup Jens B. Frederiksenip danskit naalakkersuisui 2010-mi peqquai Nunatsinni biilinik aalajangersimasumik misissuisarnissamut aaqqissuussinermik nutaamik eqqusseqqullugit. Tamannali kinguneqarsimanngilaq.
