Bremset ajoqutillit atuinnarsinnaajunnaarpatit
Danmarkimi angallannermut ministeeriaqarfik Nunatsinni aqqusinikkoorutinik motoorilinnik aalajangersimasumik akuttussusilimmik misissuisalerniarpoq. Nunatsinni naalakkersuisut kissaateqarnerat naapertorlugu taama pisoqassaaq. Tamanna piviusunngortinniarlugu, Nunatsinni biilileriffiit ilaat taamatut misissuisinnaatitaasutut akuersissuteqalissapput.
Biilit piffissani aalajangersimasuni ullumikkut misissorneqarneq ajorput. Biili allamik piginnittoqaleraangat politiinit misissorneqartarpoq, kisianni taakku misissuinerat biilileriffiup taama suliaqarnissamut akuerineqarsimasup misissuineranit sukumiinnginnerusarpoq. Taamaattumik Nuummi Politeeqarfiup pisortaata Niels Nyvangip aaqqiineq nutaaq iluarisimaarpaa.
- Imaassinnaavoq biilit angalaartut ilaat inatsisinut naapertuutinngitsumik akisussaassuseqaratillu angalaartut. Uagummi tamakkununnga ilisimasavut killeqarmata takusinnaasavut aamma killeqartaramik, Niels Nyvang oqarpoq.
Inatsisissatut siunnersuutip upernaaru saqqummiunneqarnissaa, Danmarkimi angallannermut qullersaqarfiup ilimagaa. Qanorpiaq aaqqissuussisoqassanersoq, politiinut Nunatsinnilu Naalakkersuisunut oqaloqatiginnissutigineqaqqaassaaq.
