Qamuteralatsillutik ajunaartut eqqaaniarneqartut – aliasunneq ersersittariaqartoq
Angutit inuusuttut marluk Nuummeersut qamuteralatsillutik aputip sisoornerata kinguneranik ajunaarmata amerlasuut eqqugaapput, sulilu aliasuutaalluni. Tamannalu Niclas V. Sørensenip iliuuseqarfigisariaqarsorivaa.
- Eqqartueqatigiinnikkullu taamalioraanni pitsaanerpaassasoq, taanna oqarpoq.
Taamaammat Nuummi sapaatiuppat arpatsitsinissamik aaqqissuussivoq. Arpaqataasussat Nuuk Rentalimit nalunaaqutaq 12.30 aallassapput, inuusuttut marluk februaarimi ajunaartut angajoqqaavi aqqusaassavaat arpannertillu iliveqarfik aqqusaariarlugu Killuni naggasissavaat.
- Nukappissat ajunaartut eqqaaniarlugit taama aaqqissuussivunga, aammali annaasaqarsimasut aliasuuteqartullu misiginneqatiginninnermik takutitsiffiussalluni, Niclas V. Sørensen oqarpoq.
Aliasunnermik atugaqarneq ajortuunngitsoq, aliasuuteqarnermilli ammasumik eqqartuineq imminut ikiornerusoq, taassuma aamma ersersinniarpaa.
- Aliasuuteqartoqarsinnaasoq inunnut oqaatigerusuppara, kisianni nammineq misigissutsit akisussaaffigalugit suliarineqassapput, suliarinerannilu aliasuuteqarneq allanut takutinneqassaaq. Taamaaliornikkulli nakkarfinni qaqeqqinnissamut periarfississaatit.
Tapersiisoqarnera killitsinnartoq
Niclas V. Sørensen inuusuttut marluk eqqaaniarlugit arpatsitsinissamik isumassarsigami ikinngutigiiaarlutik arpannissartik eqqarsaatigisimavaa.
- Inuit arfinillit qulillu akornanniissasugut takorloorpara. Taamaammat taama amerlatigisut peqataarusunnerat killitsinnarluinnarpoq, taanna oqarpoq.
Taassumami isumassarsiani oqaatigimmagu arriitsumik amerliartulerput.
Taamaammat sapaatiuppat arpassutilertussat 100-t missaanniipput, 200-llu sinneqartut pisussamut soqutiginninnerminnik Facebookikkut takutitsipput.
- Arpatsitsineq inunnut uisitsinerussaaq, tamannalu kikkunnut tamanut aliasuuteqartunut tapersersuisorpassuaqarneranik takutitsissalluni.
- Taamaammat annaasaqarsimasunut tamanut arpannerusoq oqaatigissallugu aamma pingaartippara. Nukappissanik ukununinnga ilisarisimannittunuinnaq arpatsitsinerunngilaq, Niclas V. Sørensen oqarpoq.
Arpanngikkaluarlunilu ingerlaarfissami pisuinnartut tikilluaqqusaasut, taassuma erseqqissaatigaa. Aqqut pisuinnarfiginiarukku pisuttussat nalunaaqutaq 12.00 aallartissapput.
Aaqqissuussinerli Nuuk Rentalip eqqaani nalunaaqutaq aqqanermut aallarteriissaaq.
Qaniginerpaasannut nipituumik oqaatigiuk
Niclas V. Sørensenimmi tamanna pisumit alianarluinnartumit anginerujussuunerarpaa.
- Uannut ataatsimut eqqaamasassanik pilersitsinissamut, ilaquttanut asanninnermik tunniussaqarnissamut aammali alisuuteqarnerup nammineq pigiinnarneqannginnissaanut tunngavoq. Tamannalu isumassarsiamut aallaaviuvoq, taanna oqarpoq.
Taamaammat taassuma sapaatiuppat arpatsitsineq aliasuuteqaraanni sanngiinnermik takutitsisoqarsinnaaneranik kinguneqassasoq taassuma neriuutigilluinnarpaa.
- Nammineq aliasuuteqartoqarsinnaavoq. Aliasunnermik qanga nalaataqarsimaneq apeqqutaatinnagu suliarinissaanut alloriarnissamut kingusinaartoqanngisaannarpoq.
- Aliasuummik takutitsinissaq alloriarnermi siulliussaaq, Niclas V. Sørensen oqarpoq.
