Politiit ullormut nalunaarutaat: Angut inuusuttoq umiatsiartilluni imaanut tammiussaavoq

Nuummi inuit arlallit politiinut ippassaq ualigaa nalunaaruteqarniarlutik siarngupput.

Taakkua tamarmik umiatsiaq kassumut aporluni imaanut tammiussaasimasoq nalunaarput.

Taamaammat upalungaarsimasut, politiit, qatserisartut ambulancellu annaasiniarlutik ornigutilertorput.

Politiit pigaartuisa pisortaat Carl Sværd ullaaq manna taama ilisimatitsivoq.

Umiatsiartilluni ajutoortoq 17-inik ukiuliusoq paasinarsivoq taannalu imaanut tammiussaareernermini nalulluni umiatsiaminukarami nammineq ikeriarluni nunamukarsinnaasimasoq, politiit pigaartuisa pisortaat oqarpoq.

- Tulakkamilu qioqqajaammat napparsimmavissualiaanneqalertorpoq, taanna oqarpoq.

Taamaammat politiit umiatsiartilluni ajutoortoq 17-inik ukiuliusoq killisiorsinnaasimanngilaat, politiilli pigaartuisa pisortaat umiatsiartartunut tamanut sukannersumik kajumissaaruteqarpoq.

- Umiatsiartilluni puttaquteqartarnissaq umiatsiallu motooriinik unitsigasuaateqarnissaq pingaaruteqarpoq, Carl Sværd oqarpoq.

Ukiukitsut biilinik aallarussisut

Politiit pigaartuisa pisortaat umiatsiartartunuinnaanngitsoq aammali biililinnut tamanut sukannersumik aamma kajumissaaruteqarpoq.

- Inuit biilitik ikumatiinnarlugit qimattassanngikkaat kajumissaarutigaarput.

Politiimmi ukiukitsunik aallarussanik biileqattaartunik sisamaasunik unnuaq naammattuugaqaqqipput, taakkunanngalu marluk tigusaralugit.

- Biilinik aallarussisoqarsimasoq politiinut ippassaq ualikkut tallimat qaangeraa nalunaartoqarpoq, alapernaarsuisortattalu aallarunneqarsimasutut nalunaarutigineqartunik biilertut unnuaq pingasunngulersoq naammattooramikkit malersulerpaat, politiit pigaartuisa pisortaat oqarpoq.

Biilinik aallarussanik biilertillutik naammattoorneqartut sisamaasut 15-it 18-illu akornanni ukioqarput, taakkunanngalu marluk politiinit qimaariarluartut tigusaapput.

- Aappaa qimmitsinnik unitsitaanermigut tigusaavoq, Carl Sværd oqarpoq.

Inuit biilitik parnaarnagit matuersaataalu atatiinnarlugit qimassimagaat paasinarsigaangat unnerluutigineqarataannaasinnaasarput, taamaammat inuit biilitik isumannaannerusumik qimattassagaat kajumissaarutigigitsik, politiit pigaartuisa pisortaat oqarpoq.