Politiit ullormut nalunaarutaat: Nuummi ikuallattoqarpoq, umiatsiamik aallarussisoqarpoq tillinniartoqarlunilu

Kalaallit Nunaanni Politiit nalunaaquttap akunnerini kingullerni 24-ni suliaat uissuumminartortaqaaluttut, politiit pigaartuisa pisortaat Jeppe Andsager ilisimatitsivoq.

Politiit suliaasa ilaat nukappiaqqat pingasut Nuummi containermik Iggu Pizzeriap eqqaaniittumik ikuallatsitsinerannut tunngasuuvoq.

Nukappiaqqat containermik ikuallatsitsileruttorneranni videomik nakkutilliissummik immiunneqarsimapput, taamaaliornerannillu takunnissimasinnaasut oqaloqatigerusoqigitik, politiit pigaartuisa pisortaat Jeppe Andsager oqarpoq.

- Sapaammi ullukkut ataatsimut sioqqullugu taamaaliorput, ikuallattorli siaruaatilerpallaartinnagu Iggumi sulisut qatserpaat, taanna oqarpoq.

Peqqissaanermik Ilinniarfik tillinniarfigineqartoq

Politiit Nuummi ataasinngornermut unnuaani marlunngoriartornerani pisumik takunnissimasinnaasunit aamma attavigeqqupput.

Tassami Peqqissaanermik Ilinniarfimmi tullinniartoqarneranik unnuaq nalunaarfigineqarput, tassungalu tillinniat matumik aseruillutik isersimasut paasinarsivoq.

- Tillitaqarsimarpasinngillat, takunnissimasinnaasulli politiinut attaveqaqqunaqaat, Jeppe Andsager oqarpoq.

Ukiukitsut umiatsiamik aallarussisut

Politiit suliaanni uissuumminartunut ilaasuusoq Nuummi ullaassaq pisumut tunngasuuvoq. Tassa umiatsiaatillit ilaata umiatsiani aallarunneqarsimasoq politiinut arfinermut qiteqqutilertoq nalunaarutigaa.

Umiatsiamik aallarussisut marluk ukiukitsuusut aallarussaminnik Nuup Kangerluanukariarlutik utersimasut paasinarsivoq.

Aallarussisup aappaa umiatsiamik aallarussamik piginnittumit politiit ornigunnissaasa tungaannut qimaatsaalineqarpoq.

- Aallarussisup aappaa qimaavoq, oqaloqatigisarpulli aqqaneq-marlunnik ukiuliusoq paasinarsivoq, taamaammallu suliaq taanna isumaginnittoqarfimmut ingerlateqqinneqarpoq, Jeppe Andsager oqarpoq.

Arnaq Paamiuni arfininngormat savimmik kapisisimasutut pasineqarluni politiinit tigusarineqartoq, sapaatit akunnerata naanerani aamma oqaluttuaraarput.

Arnaq pasineqartoq eqqartuussivimmi sassartinneqarnermini ulluni 25-ni, tassa januaarip ulluisa qulingiluaata tungaanut tigummigallagassanngortinneqarpoq.