Qamuteralannik inatsisinik annertuumik unioqqutitsisoqartarnera paasineqartoq
Inuussutissarsiutigalugu piniartut Nuup Akiani snescooterertoqartarnerarlugu maalaaruteqarnerisa kingorna nakkutilliiartortoqarpoq, taamaaliortoqartarneralumi uppernarsineqarpoq. KANUAANA-meersut misissuinermi qamuteralaatt nunaannarmi aqqutigisimasarpassui siumorpaat illuaqqallu silataanni qamuteralaat aamma naammattoorneqarlutik.
AammaUttoqqarmiut Kangerluarsunnguata paavanit, Amitsuarsummit qamuteralaat 10-15-it Nuummukarlutik aallartut paasineqarput. Unioqqutitsinerit pineqartut assingisaallu ukiuni arlalinni pisarsimapput.
Assartuutit motoorinik ingerlatillit nunaannarmi atorneqarneri Namminersorlutik Oqartussat nalunaarutaat nr. 10 oktobarip 10-anneersoq, 2013-imeersoq Avatangiisit innarlitsaaliorneqarnissaannik Inatsisartut inatsisaani nr. 9-mi, 22. november 2011-meersumi tunngaveqartoq malittussaavaat.
Kommunalbestyrelsi naalunaarut naapertorlugu Pinngortitaleriffimmit siunnersorneqareerluni snescooterit ukiukkut aqqutissaannik aalajangersaasinnaavoq.
Qamuteralattut Nuummukarnerminni tuttoqarfippassuit aqqutigalugit ingerlaarput, soorlu assersuutigalugu Eqaluit Paarliit timaat, Qasigiannguit timaat, Kangerluarsunnguup Tasersua, Nipaatsoq, Naajaat Kuuat, Kilaarsarfik kiisalu Aputitooq. Kapisillit eqqaanniit nalinginnaasumik aqqutigisartakkamikkut Nuummukarlutik.
Aamma Austmannadalip eqqaatigut qamuteralattut ingerlaarput, tamannalu nuna 2008-mili eqqissisimatitaalluni. Unioqqutitsinerillu taakkuinnaanngillat:
- Taassuma kingorna aamma Aalisarnermut Piniarnermullu Naalakkersuisoqarfik KANUAANA-lu Ilulialimmi, Qussummi aamma Kikialinni inatsisinik unioqqutitsisumik nunaannarmi snescooterertoqartoq paasivaat, snescooterillu assartuummik Nuummeersumik assartorneqartut assilisimallugit, uppernarsaatigineqarlutik, naalakkersuisoqarfik tusagassiorfinnut nalunaarummi taama allappoq.
