Qamuteralannik ajutoornerup kingorna angut unnerluutigineqartoq
Unnuk inuusuttut nuannisarfissaraluat ajutoornermik kinguneqarpoq, angutillu marluk napparsimmavimmut unitsinneqarlutik. Politiit ajutoornerup kingorna ullut pingasut qaangiummata, februaarip 20-ani, oqaatigaat qamuteralaat marluk Uummannap pigisaani nunaqarfiit Nuugaatsiap Illorsuillu akornanni aporsimassagunartut.
Paasissutissalli nutaat naapertorlugit qamuteralannik ingerlatsisup aappaata inuit qamuteralaat eqqaanni nikorfasut arlallit aporsimavai.
- Angut angallannermut inatsimmik arlaleriarluni unioqqutitsisimasutut unnerluutigaarput, paasiniaanerpulli suli ingerlapparput, taamaammat unnerluussutaasut soorpiaanersut oqaatigisinnaanngilara, Ilulissat politiivineersoq Sebastian Bech taama oqarpoq.
AAMMA ATUARUK Qamuteralaat apornerini inuit marluk ajoquserujussuartut
Sebastian Bechip ilisimatitsissutigaa qamuteralannik ingerlatsisup piaaraluni angutinik marlunnik apuiniarsimaneranut takussutissaqanngitsoq.
Aportittup aappaa suliaritikkiarluni Danmarkimut aallarunneqarpoq, aportittup aappaa Nuummi Dronning Ingridiup Napparsimmavianut unitsinneqarpoq maannamullu suli uninngalluni.
AAMMA ATUARUK Angut qamuteralatsilluni ajunaartoq
AAMMA ATUARUK Angut inuusuttoq qamuteralannik ajutoorluni ajunaartoq
