Qamuteralaat apornerini inuit marluk ajoquserujussuartut
Uummannap eqqaani nunaqarfiit Nuugaatsiap Illorsuillu akornanni qamuteralaat marluk tallimanngormat aporsimapput, unnukkullu nalunaaqutaq 20.15 politiit aportoqarsimaneranik nalunaarfigitissimallutik.
Inuit marluk annertuumik ajoqusersimammata qulimiguulik annaassiniartartoq Kangerlussuarmiit Nuugaatsiamukasimavoq ajoqusersimasullu Nuuliaanneqarsimallutik.
- Ajoqusersimasup aappa Danmarkiliaanneqartariaqarsimasoq ilisimatinneqarpunga, Qeqqata Qaasuitsullu politiivini aqutsisoq, Johan Davidsen KNR-imut oqarpoq.
Ajoqusersimasut inuunerminnik ulorianartorsiornersut ulorianartorsiunnginnersulluunniit, Johan Davidsenip oqaatigisinnaanngilaa, paasissutissanillu amerlanerusunik tunniussisinnaanani.
- Qamuteralaat apornerini qanorpiaq pisoqarsimanersoq Uummannami politiit manna misissuiffigaat. Neriuppugut susoqarsimaneranik paasisaqarnerussalluta Johan Davidsen naggasiivoq.
AAMMA ATUARUK Angut qamuteralatsilluni ajunaartoq
AAMMA ATUARUK Angut inuusuttoq qamuteralannik ajutoorluni ajunaartoq