Qallunaat Nunaat - Inooriaaseq oqinnerusoq
![](/sites/default/files/styles/image_934x467/public/article_images/danmark_gadebillede_630_5.jpg?itok=xX_MT9M7)
Nunanik taakkuninnga toqqaanissami kalaalerpassuit Danmarkimiittut taamatut isigisarpaat.
- Ilaannikkut Kalaallit Nunaat maqaasisarpara. Ingammik aggustimi tuttunniarfiup nalaani, angajora arnaataalu ilagalugit. Kisianni eqqarsaatigivallaarneq ajorpara. Danmarkimut nuunniarlunga aalajangersimavunga, maaniiginnassaangalu. Inissiami najugaqarpunga nuannarisannillu suleqateqarlunga suliffeqarlunga. Tamaaniikkusuppunga.
Taama oqarpoq angut kalaaleq misissuinermut atatillugu apersorneqarluni akissuteqarluni. Kalaallit Danmarkimiittut ilisimasaqarfiginerulerniarlugit Atlantikup avannaani Suleqatigiiffiup misissuisitsinerisa una pingajoraat. Siunertarineqarpoq aaqqiissutissanik arlaqartunik tikkuussisinnaanissaq, taamaalillunik nutsernerujussuaq Kalaallit Nunaata unitsissinnaaniassammagu.
Kalaallit kinguariit siulliit Danmarkimut nuuttut, Kalaallit Nunaannut angerlarsertarnerat nalunaarusiami nalilerneqarpoq, ingammik ilaquttanut, pinngortitamut, nerisassanut, sunngiffimmi sammisartakkanut aamma inooriaaseq ulapinnannginnerusoq eqqarsaatigalugu. Kisiannili aamma misigisarpaat, Danmarkimi inooriaatsimut oqinnerulaartumut, ingammik ilaqutariinnut meerartalinnut sanilliullugu Kalaallit Nunaat taamaattumik neqerooruteqarsinnaanngimmat.
Ilaatigut attaveqaatit, inissaqarniarneq, atuarfiit, peqqinnissaqarfik Kalaallilu Nunaanni inuuniarnikkut annertuumik assigiinngissuseq isornartorsiorneqartarpoq. Taamaattumik Atlantikup avannaani Suleqatigiiffiup nalilerpaa, nutsernerujussuup allanngortinneqarnissaa suliassaasoq annertooq sivisuumillu ingerlaanneqartussaq.
Akerlianik kalaallit Danmarkimiittut piffissami sivikinnerusumi Kalaallit Nunaanni sulerusunnerat ersersinneqarpoq. Tamannalu ullumikkorniit Kalaallit Nunaata iluaqutiginerusinnaagaa, inassuteqaammi ersersinneqarpoq. Tassami suliartorluni nuukkallarnerit nuuinnermik kinguneqarsinnaapput, ingammik inuiaqatigiit ineriartornerat ilutigalugu, ilaatigut taama tunngavilersuisoqarpoq.
Atlantikup avannaani Suleqatigiiffiup kalaallit Danmarkimiittut pillugit nalunaarusiaat marluk ullumi Katuami saqqummiunneqarput.