Qalerallit ilulissat eqqaanniitut minnerulersimapput
Tamatumalu kinguneraa qaleralittassiissutigineqartut tamakkerniarlugit amerlanerusunik qaleralinniartoqartariaqartarnera.
Qalerallit kangerlunni anginerulernissaat utaqqineqartartuuppata tunisassiarineqartarneri iluanaarutaanerussagaluarpoq, biologeq isumaqarpoq.
- Pingaartumik Ilulissat eqqaani qalerallit ukiuni kingullerni minnerulersimasut takuarput. Agguaqatigiissillugu 1990 naalerneranit centimeterinik qulinik minnerupput.
Aalisagartassiissutigineqartut tamakkerniarlugit qalerallit amerlanerusut aalisarneqartartut, Helle Siegstad oqarpoq.
Qalerallit angissusaat agguaqatigiissillugu 62 centemeterinit 52centimeterinut minnerulersimapput, tassalu qalerallit oqimaassusaat 40 procentinik annikinnerulerluni, pinngortitaleriffimmi immikkoortortaqarfimmi pisortaq, Helle Siegstad oqarpoq.
Qalerallit avataani tukertarput, sinerissallu qanittuini kangerlunnilu alliartortarlutik. Annerulernissaat utaqqinagu aalisarneqartarneratigut, aalisakkap tunisassiartaa annikinnerusarpoq, Pinngortitaleriffimmi immikkoortortaqarfimmi pisortaq Helle Siegstad oqarpoq.
Qaleralinniarneq ajunnginnerusumik aqunneqarli
Qaleralinniarnerup ajunnginnerusumik aqunneqarneratigut anginerulernissaat anguneqarsinnaavoq, tunisassiassartaalu annertunerusoq anguneqarluni, Helle Siegstad oqarpoq
Qalerallit 8.000 tonsit Qeqertarsuup tunuani 2015-mi 2016-milu aalisarneqarsinnaanerat pinngortitaleriffimmit innersuussutigineqarput.
Qalerallit 9.073 tonsit 2013-mi aalisarneqartut, NAFO-mi bioligit 2015mut 2016-mullu siunnersuutaani atuarneqarsinnaavoq.
Qalerallit Ilulissat eqqaanni minnerulersimanerannik Helle Siegstadip oqarnera aalisakkanik tunisassiorfimmit, Halibut Greenlandimit, uppernarsarneqarpoq.
- Aalisartut oqaloqatigineqartut arlaqartut oqarput qalerallit Ilulissat eqqaani aalisarneqartut ukiuni kingullerni minnerulersimasut, Halibut Greenlandimi pisortaq, Niels Thomsen oqarpoq.
Qalerallit anginerusut aalisarneqarsinnaanerat qulakkeerniarlugu oqallittoqarnissaa taassuma piffissanngorsoraa.
- Qalerallit milliartornerat ingerlaannassanngilaq, Niels Thomsen oqarpoq.
