Qajaq aningaasanut inatsimmiilissaaq

Peqatigiiffiit qaannat kattuffianni siulersuisut paatitik tamassa kivissimaarpaat.

Tamanna pivoq 2024-mi aningaasanut inatsisissamut partiit isumaqatigiissut ukiumut 250.000 koruuninik Peqatigiiffiit qaannat kattuffiannut tunniussisalernissaq isumaqatigiissutigimmassuk.

- Aningaasaliineq taanna nuannaarutigisorujussuuarput. Ukiumoortumik naapittarnitsinni aningaasat taakku pisariaqartittorujussuuaagut, Peqatigiiffiit qaannat kattuffianni siulittaasoq Johanne Tobiassen KNR-mut oqarpoq.

- Illoqarfimmut unammersuarfiusussamut containerit umiarsuartigut nassiuttarpagut tamannalu akikitsuinnaanew ajorpoq aamma utimut nassiuttussaasarmata. Maanna aningaasanut inatsimmut ilanngukkutta nassiussinnissamut akissaqalissaagut, Johanne Tobiassen oqarpoq.

Qanimut suleqatigiinneq

Peqatigiiffiit Qaannat kattuffiat ilisimatitsivoq siorna Ilulissani qaannat unammersuarmata qaannat containerit atorlugit assartorinerinnaannut 164.000 koruunit aningaasartuutigineqarsimasut.

Ataqatigiit, Siumut, Atassut, Naleraq aamma attaviitoq aappaagu aningaasanut inatsissamut suleqatigiinniarlutik sapaatip akunnera kingulleq atsioqatigiipput. Taamaasilluni siullerpaamik qajaq aningaasanut inatsimmut ilanngutissaaq.

- Containerinik assartuisarneq maannamut ingerlatsinermut missingersuusititsinniittarpoq. Aningaasat taakku suliniutinut allanut atorsinnaalluaraluarpagut, Johanne Tobiassen oqarpoq.

- Kattuffiit allat qanimut suleqatigerusuppagut. Nunatsinnimi inuppassuunngilagut pitsaassaqaarlu kulturikkut kingornussaq pillugu qaninnerusumik suleqatigiikkutta aamma isumaqannginnammi assigiinngissutit annertunngitsut piinnarlugit suleqatigiinnginneq, Johanne Tobiassen oqarpoq.

Avannaata Qimussersua kulturikkut kingornussatut nalilerneqarluni aamma ukiut arlallit aningaasanut inatsimmiippoq.