Qaasuitsup Kommuniani meeqqerivinnik sanaartortitsiniarput

Ajornartorsiut taanna kommunalbestyrelsimi ilaasortanik ilisimaarineqarpoq iliuuseqarfiginiarneqarlunilu.

Qaasuitsup Kommuniani illoqarfinni assigiinngitsuni meeraaqqerivinni meeqqerivinni inissanik amigaateqartoqarpoq, asserssuutigalugu Qaanaami 16-it utaqqipput, Upernavimmi 17-it, Uummannami 18-it, Ilulissani 23-t, Aasianni 36-t Kangaatsiamilu arfineq-marluk.

Meeraaqqerivimmut inissamik ukioq ataaseq sinnerlugu utaqqisariaqartut

- Tamanna kialuunniit akuersaarsinnaanngilaa, angajoqqaat suliniaraluarlutik meeqqatik paarsisussaqartinngikkunikkit ajornartorsiulersarput taamaalillutillu inuuniarnerminnut ajornartorsiulersinnaasarlutik. Ajornartorsiut arajutsisimanngilarput, neriuppugullu sanaartorneq aappaagussamut aallartinneqarsinnaassasoq, soorlu uani pineqartumi Upernavik eqqarsaatigalugu, Kristian Broberg kommunalbestyrelsemi Siumut sinnerlugu ilaasortaq oqarpoq.

Kristian Brobergip aamma erseqqissaatigaa meeraaqqerivinnut meeqqerivinnullu utaqqisut ikilisinniarlugit sanaartornissamik pilersaaruteqarlutik Inatsisartullu akuersinissaat kisimi utaqqisaasoq.

Kommunalbestyrelsemi illuatungiliuttut suleqataanissamut piareersimapput. Inuit Ataqatigiinniit Ane Hansen oqarpoq suliassaq pingaarnerpaatut inissinneqartariaqartoq.

- Inuit Ataqatigiinnit piumasarinikuuarput meeqqerivinnik sammisassaqartitsivinnillu sanaartornerit salliutinneqassasut. Angajoqqaat sulerusukkaluarlutik paarsisussaaleqinertik peqqutigalugu angerlarsimaannartariaqartarnerat ilungersunartuuvoq akuerineqarsinnaananilu, Ane Hansen erseqqissaavoq