Meeraaqqerivimmut inissamik ukioq ataaseq sinnerlugu utaqqisariaqartut
Upernavimmi meerarpassuaqarpoq, paaqqinnittarfinnilu inissat ikitsuinnaallutik. Tamanna pissutigalugu ukioq ataaseq sinnerlugu utaqqisoqartariaqartarpoq, ilaqutariinnullu illoqqarfimmi najugalinnut tamanna kipiluttunartupilussuuvoq.
Upernavik 1100-it sinnilaarlugit innuttaasoqaraluartoq illoqarfimmi meeraaqqerivik ataasiinnavoq, taannalu meeqqanut 24-nut inissaqartilluni.
May Marie Karlsen Upernavimmi najugaqarpoq ataatsimillu ukiulimmik erneqarluni. Meeraaqqerivimmi inissamik siorna juunip qaammataanili utaqqilerpoq, piffissamilu tassani inooqataata ernera paarisariaqarsimavaa.
- Ernera qaammatit qulingiluat utaqqisut allattorsimaffianniippoq, May Marie Karlsen oqarpoq.
Meerarlu allatigut paarsisussaqartinneqanngimmat inooqatigiisaa suliffissarsiorsinnaanngilaq. Aamma nammineerluni erninerminut atatillugu sulinngiffeqareerluni sulinngiffeqarnissani tamaat atortariaqarsimavaa.
- Siorna aggustimi sulileqqittussaangaluarpunga, taama oqarpoq.
Ilinniartitaaneq pillugu 2014-imut periusissami allassimavoq meeqqat 0-5-inik ukiullit 2018-ip tungaanut amerliartuinnassasut, meeqqallu atualertussat perorsaanikkut ineriartuutaasumik neqerooruteqarfiginissaannik pisariaqartitsineq alliartuinnassasoq. Meeqqat tamarmik ulluunerani neqeroorutinik assigiimmik pissarsisinnaanissaat Naalakkersuisut takorloorpaat.
Qaasutsp Kommunianit oqaaseqartitsiniaraluaratta iluatsinngilarput.