Qaasuitsup Kommuneani Nunaqarfimmi aqutsisut piginnaatitaaffeqarnerulerlik
Inuiaqatigiit kalaallit ilusiligaanerisa malitsigisaanik innuttaasut ulluinnarni atukkatik pillugit ungasissorsuarmi aalajangiisoqaannartarneranik misiginneqassanngippata najukkami tamat oqartussaaqataanerisa nukittuujunissaa ingerlalluarnissaalu pisariaqarluinnarpoq. Tamannalu anguniarlugu nunaqarfinni aqutsisut pilersinneqarsimapput, tamatigulli siunertamut naapertuuttumik ingerlasoqartarsimanngilaq.
Nunarput tamakkerlugu nunaqarfinni aqutsisussanik ullumikkut qinersisoqassaaq, ilaasortanngortussalli aalajangiisoqassatillugu oqaasissaqarpallaarneq ajorput. Tamannalu allanngortinneqarsinnaasoq, Siumup qinigassanngortitaa Jens Kristian Therkelsen isumaqarpoq.
-Qaasuitsup Kommuniani nunaqarfippassualimmi aqutsisut ukiut kingulliit sisamat piginnaatitaaffii sumiginnarneqarsimasutut ipput, isumaqatigiissuteqarluni ingerlatsineq qinigaaffik nutaaq aallartimmat isumalluarnartumik aallarteriaraluartoq unissimavoq, tamanna aqutsisut sulinerannut appariaataasimavoq annertooq, Therkelsen oqarpoq.
Taamaattumik uani qinigaaffimmi sulissutissat pingaartut ilagilluinnarpaat nunaqarfimmi aqutsisut piginnaatitaaffiisa nalilersoqqinneqarnissaat, isumaqarama taamaasiornikkut namminneerlutik pitsaasumik pilersaarusiorluarnermikkut ajunngitsumik kingunilimmik alloriarsinnaasut. Aammalu kontot iluini nuussisinaanissamut periarfissinneqartariaqarput sinaakkusiussat iluini.
-Qinigaaffik qaagiuttoq aqutsisuniit saaffiginnissutit akineqarneq ajortut amerlapput,tamakku aaqqiivigineqartariaqartut ilagilluinnarpaat,isumaqarpunga nalilersugassat ilagilluinnartariaqaraat nunaqarfileriffimmik Qaasuitsup Kommuniani pilersitsisoqarnissaa, Jens Kristian Therkelsen oqarpoq.
