Qaartitsisoqarnerani ersaattaattoqarlunilu akerliusoqartoq

Nuummi mittarfissap eqqaani ullumi siullermeertumik qaartitsisoqarnerani ersaattaattoqarlunilu akerliusoqarpoq.
Nuummi mittarfissap eqqaani mittarfinnut pilersaarutit sanaartornertaata aallartinneqarnera malunnartinniarlugu nalliuttorsiorpaluttumik ullumi qaartitsisoqarpoq. Assi © : Malik Brøns, KNR
Allattoq Ivik Kristiansen
oktobarip 16-at 2019 16:52
Nutserisoq Connie Fontain

- Ullumi ulloq nuannerpoq, Nuummi nunanut allanut mittarfissap ukiorpassuarni kingullerni oqallisigineqartup pilersinnissaanut maanna aallaqqaasiisinnaalerpugut, Kalaallit Airportsimi pisortaaneq, Peter Wistoft oqarpoq.

Ukiorpassuarni oqallittoqangaatsiareersoq suliaqarneq ullumi tassa aallartinneqarpoq.

Nuummi mittarfissap eqqaani mittarfinnut pilersaarutit sanaartornertaata aallartinneqarnera malunnartinniarlugu nalliuttorsiorpaluttumik ullumi qaartitsisoqarpoq.

AAMMA ATUARUK Qaartitsineq siulleq: Mittarfissualiulerneq nuannaarutigineqarlunilu uggorineqartoq

Nuummi mittarfiup tallineqarnissaa mittarfinnut pilersaarutit ilagaat, tassani Ilulissani mittarfiup tallineqarnissaa Qaqortumilu mittarfimmik nutaamik sanaartortoqarnissaa ilaapput.

Pingasunngorpat qaartitsisoqassasoq

Kalaallit Airport Nuummi nunanut allanut mittarfissap sanaartornissaanut qaartiterineq siulleq aallartilerpaa.

 

Nuummi Ilulissanilu mittarfiit sanaartorneqarnerat ukioq 2023-ip naalernerani naammassineqassasut naatsorsuutigineqarpoq.

 

Qaqortumi mittarfissaq 2023-mi naammassineqarsimasussatut pilersaarutigineqarpoq, aappaagulu suliariumannittussarsiuunneqarnissaa naatsorsuutigineqarpoq.

 

Nuummi mittarfissap sanaartorneqarata aallartinneqarnera, Nuummi sisoranermi majuartaatip Skilftenip eqqaani pingasunngorpat oktoberip ulluisa 16-ianni ualikkut tallimanut qiteqquppat malunnartinneqassaaq siullermeerluni qaartitsinikkut.

- Kalaallit inuiaqatigiivinut ineriartortitsinissamut periarfissarujussuuvoq, tassa inuit ornittagassaata inissisimaffissaanni maanna mittarfittaartoqassaaq, mittarfiit siulliit pilersinneqarneratulli sakkutuunut atorneqartussanngitsoq tassani inissisimassaaq, Peter Wistoft oqarpoq.

Ukiorpassuarni oqallittoqarujussuareertoq ullumi qaartitsisoqarpoq.

Kim Kielsenip nukappiaraq ilagaa, oqalugiarnerminilu oqaluttuarisaanermi pingaarutilimmik qaartitsineq taassuma qaartikkaa oqaatigaa.

- Inooraq saninni nikorfavoq. Tassaavoq taanna toorsisoq, qaartitsisoq. Nunatta siunissaani kinguaariit taakkua tullinnguummata tassani qaartitsinermi peqatigivarput, Kim Kielsen oqarpoq.

Assi © : Doris Jakobsen
Arfineq-pingasunik ukiullip Inooqqap qaartitsinissamut siullermut toortagaq toorpaa.

 

- Silaannakkut angallanneq massakkut alloriarneq tulleq 2023-mi pissaaq. Tassa sinerissami, Ilulissani, Nuummi Qaqortumilu ataatsikkut naammassineqarnissaat siunniunneqarpoq. Nunatsinnilu angallatseriaaseq allanngorujussuassaaq, Kim Kielsen oqarpoq.

Kim Kielsenip mittarfinnut pilersaarutit politikkikkut qularnartoqartitsilertartut sukataarutigisimavai

Taassuma ullumi siullermeertumik qaartitsinnginnermi nunat tamalaat akornanni politikkit annertuut nunatsinnilu politikki sammisariaqarsimavai.

Kinamiut mittarfinnut pilersaarutinut aningaasaleerusunnerat Kinap Issittumut iserniarluni aningaasaliiniarniarnera USA-mit aarlerissutaavoq.

AAMMA ATUARUK USA Danmarkilu Kina pillugu isumaqatigiinngissuteqarput

Naggaterpiaanili danskit naalagaaffiat aningaasaleeqataasutut inissippoq. Tamannali Siumut partiiata iluani kamaatigineqarpoq, Kim Kielsenillu partiimi siulittaasutut tunuarnissaanik piumasaqaateqarnermik kinguneqarluni.

Partii Naleqqap tamanna aamma kamaatigaa, danskit Nuummi Ilulissanilu mittarfiliortiternissamut danskit piginneqataalernerat akerlilerlugu partii naalakkersusisooqatigiinnit tunuarpoq.

AAMMA ATUARUK Partii Naleraq Naalakkersuisooqatigiinnit peqataajunnaartoq

Mittarfinnut pilersaarutit suli ilorrisimaarutigineqanngillat. Minnerunngitsumik Nuummi, tamanna pissutigalugu ullumikkut qaartitsineq ersaattaassutigineqaannanngilaq.

- Soorunami assut ajuusaarpunga, peqatigiiffimmi Angisunnguamit oqaaseqartartoq, Christian Jeremiassen oqarpoq.

Peqatigiiffik Angisunnguup Nuummi maanna mittarfiup tallineqarnissaa piffissami sivisuumi akerleringaatsiarpaat. Illoqarfiit pingaarnersaanni silap allanngorartarnera timmisartut qanoq akulikitsigisumik qangattarsinnaanatillu missinnaasannginnissaat ilaatigut uparuarpaa.

- 55 minuttit missaannik sipaarniarneri arlaannulluunniit iluaqutaassanersut massakkut naluarput, pissutigalugu, toqqaannartumik Københavnimit Nuuliarniarlutik aallaraluarpata imaassinnaavoq Kangerlussuarmut aqqusaaqqaartariaqassasut, Christian Jeremiassen oqarpoq.

Taassuma mittarfimmut pilersaarutinut atatillugu innuttaasut tusarniaaffigineqannginnerat amigaataasoraa kiisalu mittarfiup tallineqarnissaanut sillimaneq qanoq ajunngitsiginersoq suli apeqquserneqarsinnaanerarlugu.

Peqatigiiffiup Angisunnguup Nuup kujataata kitaatungaani qeqertami Angisunnguami mittarfimmik nutaamik takinerusumillu sanaartortoqarnissaa pitsaanerussanerarlugu piffissami sivisuumi tunngavilersortarsimavaa.