Partii Naleraq Naalakkersuisooqatigiinnit peqataajunnaartoq
Partii Naleraq naalakkersuisooqatigiinniikkunnaarniarluni Partii Naleqqamit Naalakkersuisut siulittaasuannut Kim Kielsenimut allapput.
Hans Enoksen KNR-imut ima oqarpoq.
- Pissutsit ilungersunarsiartuinnarmata. Naalakkersuisooqatigiinni siuttut oqaloqatigiinneq ajorpagut, taavalu piffissaq kingulleq paasisarput quaarsaarnangaarmat, tassalu naalagaaffik taavalu statsministeri tikilersoq, taavalu Naalakkersuisut siulittaasuallu nunatsinni mittarfissuassat pillugit atioqatigiilersut, uffalu ilisimareerlugu, kalaallit naalakkersuisuisa suliassaq ingerlakkaat. Naalagaaffik politikkimut toqqaannartumik akuliuppoq, taamaalilluni kalaallit nammineersinnaanerat apeqquserneqarujussuarluni. Taannalu uagut peqataaffigerusunngilarput, nunatta namminersulivinnissaa ukiorpanngortuni anguniarparput, massakkullu taamaaliornikkut sanngiillisinneqartussaasugut takusinnaavarput. Taannalu uagut peqataaffigerusunngilarput, Hans Enoksen oqarpoq.
Kim Kielsenip naalakkersuisooqatigiit nutaat maajip ulluisa sisamaanni saqqummiuppai. Siumut, Partii Naleraq, Nunatta Qitornai Atassullu naalakkersuisoqatigiinni ilaapput, partiillu taakku Inatsisartuni ilaasortani 31-iusuni 16-inik ilaasortaateqarput.
Partiilli qaammatit sisamaannaat ullullu tallimat naalakkersuisoqatigiipput.
Tusagassiortunik katersortitsineq uani takusinnaavat:
Partii Naleqqap Kim Kielsenimut allagaa aajuna:
