Qaanaaq: Utoqqaat Illuanni najugalik coronamik tunillatsittoq

Coronamik tunillatsissimasumik siullerpaamik Qaanaami siumuisoqarpoq. Tunillatsissimanerali illoqarfimmi paasineqarani Nuummi paasineqarpoq.

Utoqqaat illuannimi najugalik Nuummi napparsimmavissuarmi novembarip 13-iani misissortinnerminut atatillugu coronamik tunillatsissimasoq paasineqarpoq. Tamatuma kingorna utoqqaq kisimiitinneqalersimavoq.

Avannaata Kommunia taama allappoq.

Avannaata Kommunianit ilisimatitsissutigineqartut naapertorlugit utoqqaq pineqartoq suli Nuummiippoq, angallassisuali Qaanaamut uterluni angalasoq, maannalu Ilulissaniittoq, tunillatsissimanersoq misissorneqartussanngorpoq. 

- Taamaammat Qaanaami utoqqaat illuannut pulaartoqaqqusaajunnaarallarpoq, utoqqaallu illuanni najugallit coronamik tunillatsissimaratarnissaat paasiniarlugu misissuivigineqarput. Misissuinerit inernerinik paasisaqarnissatta tungaanut utoqqaat illuat pulaarfigineqarsinnaassanngilaq, Panigpak Daorana Qaanaami sullissivimmi aqutsisuusoq oqarpoq.

Coronap tuniluuteratarnissaa pinaveersaarniarlugu kommunimi upalungaarsimaniarnermut pilersaarutit malillugit Qaanaami utoqqaat illuanni upalungaarsimaniartoqalereersoq, Avannaata Kommunianit ilanngullugu ilisimatitsissutigineqarpoq.

- Tunillatsissimanerup aallaavia suli paasineqanngilaq, nalinginnaasumillu nuattoqarmat paasisaqaqqinnissatta tungaanut Qaanaami innuttaasut eqqissisimagallarnissaat inassutigaarput, Panigpak Daorana oqarpoq.