Atsioqatigiittoqartoq: Nuummi mittarfimmit timmisartuussisarnerit pillugit aaqqissuussineq nutaaq
Tamanna pillugu decembarip ulluisa tallimaanni taama nalunaaruteqareerput.
Trafikstyrelsip Nuummi Mittarfimmut killilersuutit nutaat sillimaniarnermut pitsanngorsaataasussat septembarip naanerani atuutilersitsinera Air Greenlandimut ilungersunartoqartitsingaatsiarpoq.
Nuup mittarfiani akunnerup ataatsip ingerlanerani amerlanerpaamik sisamanik timmisartuussisoqarsinnaanngornissaa taamanikkulli atuuppoq.
Nuummi Mittarfimmi timmisartunik aqutsineq marloqiusamik immikkoortulik TMA-mik taaneqartartoq aaqqiissutissaasoq Greenland Airportsip taamanikkut nalunaarutigaa.
Silaannakkut angallannerup nunamit timmisartunik aqutsisunit aqunneqartalernissaa timmisartullu minnerisa AFIS-imi sullissisunit isumagineqartalernissaa pineqarpoq.
Aaqqiissut nutaaq Greenland Airportsip Naviarillu ullumi atsioqatigiissutigaat, aappaagulu maajimi atuutilernissaa naatsorsuutigineqarpoq.
- Timmisartunik angallannerup nunamit aqutsisunit Nuummi mittarfimmit aqunneqartalernissaa ineriartortitsinermik pisariillisaanermillu kinguneqassaaq. Naviarip piginnaasaanut tatiginnilluarpugut, siunissamilu suleqatigiinnissamut qilanaarpugut, Greenland Airportsip pisortaanera Jens Lauridsen tusagassiutinut nalunaarummi oqarpoq.
