MIO: Qaanaami meeqqat ikiortariaqartut erngertumik ikiorneqarneq ajorput
Qaanaami meeqqat ilaqutariillu sanngitsumik inissisimasut erngertumillu annertuumik ikiortariaqartut ikiorserneqarneq ajorput. Meeqqat Illersuisuat aasaq Qaanaami angalanermini taamak nikallornartumik naliliivoq.
Meeqqat Illersuisuata angalanermini nalunaarusiaani erserpoq Avannaata Kommuniata FN-ip meeqqat pisinnaatitaaffiinut maleruaqqusaani immikkoortuni 18-ini naammassinninnissaminut annertuumik ajornartorsiuteqartoq.
Naak angalanermi nalunaarusiat tallimassaa nikalluallannaraluaqisoq nuannaarutissaqartortaaq Aviâja Egede Lynge oqarpoq.
AAMMA ATUARUK MIO-p meeqqat pisinnaatitaaffii aallakaatitassiarissagai
- MIO-p angalanermi nalunaarusiaani ilaqutariit angajoqqaallu annertuumik meeqqat atugaannut pisinnaatitaaffiinullu suliniuteqarnerat aamma ersersinneqarpoq. Tassani ilaqutariit Qaanaamilu innuttaasut meerartamik ajunnginnerpaamik atugaqarnissaannut pingaartitsinerat MIO-mit takuarput.
Angalanermi nalunaarusiap inerniliussaai tunuliaqutaralugit Qaanaami meeqqat atugarisaasa pitsanngorsarnissaat tunaartaralugu sapaatip akunnerani uani MIO Avannaatalu Kommunia isumasioqatigiipput.
AAMMA ATUARUK MIO-p nalunaarusiaa nikallornartortaqarpoq
- Borgmesterip, kommunalbestyrelsip sulisullu naaperiaanerat suleqataarusunnerallu qujamasuutigaara. Qaanaami meeqqat inuunerminni toqqammaveqarlualernissaannik neriuuteqalersitsivoq, Meeqqat Illersuisuat Aviâja Egede Lynge oqarpoq.
Uummannap Upernaviullu nunaqarfii, Tasiilaq, Kommune Kujalleq kiisalu Qeqqata Kommunia MIO-mit tikinneqareerput. Angalanermi nalunaarusiaq nutaanerpaaq oktoberip 22-ani saqqummissaa.