Malik Berthelsen: MIO-p nalunaarusiaa nikallornartortaqarpoq
MIO Meeqqallu Illersuisuat Qeqqata Kommunianut tikeraareerlutik ernumapput. Naalagaaffiimmi Peqatigiit meeqqat pisinnaatitaaffii pillugit isumaqatigiissutaanni aalajangersakkat arlallit naammassineqanngillat.
Meeqqanut suliat amigartumik kigaappallaartumilluunniit suliarineqartarnerat ernumanartinneqarpoq. Meeqqat kinguaassiuutitigut atornerlugaasimasut naammaginanngitsumik ikiorneqartarput, taavalu meeqqat angajoqqaallu akornanni hashimik atornerluineq ajornartorsiutaasorujussuuvoq.
AAMMA ATUARUK Hashi ikiorneqannginnerlu Qeqqata Kommuniani meeqqanut atugarliortitsisut
Ajornartorsiutillu ilungersunartutut kommunimit isigineqarput.
- Meeqqat toqqaannartumik oqariartuutaat atuarlugit sakkortupput. Angerlarsimaffiit imigassamik ikiaroornartumillu atornerluiffiusut najugaqarfigalugit qanoq misigisimanerminnik oqariartuutaat assut attortinnarput nikallornarlutillu, Qeqqata Kommuniani borgmesteri Malik Berthelsen taama oqarpoq.
Taamaammat Meeqqat Illersuisuata innersuussutai piviusunngortinniarlugit kommuni MIO-lu suleqatigiilerput, MIO nalunaarusiap sakkussatut qanoq atornissaanik siunnersuissalluni.
AAMMA ATUARUK MIO-p tikeraarnera Qeqqata Kommunianut 49-nik nalunaaruteqartitsisoq
Sullissisunillu tallimanik ukiortaamit atorfinitsitsinissamut missingersuutini aningaasanik immikkoortitsinissaq kommunalbestyrelsip kissaatigigaa, Qeqqata Kommunia tusagassiuutinut nalunaarummi allappoq.
