Qaa, umimmanniarniaritsi

Kangerlussuarmi umimmmaat amerlavallaarmata ikilisarneqartariaqartut, piniarnermut naalakkersuisoq Ane Hansen oqarpoq. Taamaammat piniarneqarnerat sivitsorneqarpoq, ikilisarniarlugillu iliuusissanik allanik piareersaasoqarluni.

Takornariat pisissinik umimmanniarsinnaalissapput. Aamma inuussutissarsiutigalugu piniartut nunatsinni tamaneersut, Kangerlussuarmi umimmiarsinnalissapput.
Ane Hansenilu neriuppoq, iliuusissat umimmannik ikilisaatassasut.

- Ikilisarniarnerannut iliuuseriniakkat iluaqutaassussaapput tamanna siunertaammat, ingammik umimmaat utoqqaat ikilisarneqarnissaat pisariaqarmat, Piniarnermut Naalakkersuisoq Ane Hansen oqarpoq

Inuussutissarsiutigalugu piniartut nunatsini tamaneersut Kangerlussuarmi umimmanniarsinnaanissaat ammaanneqarpoq. Qeqqata kommuniani  inuussutissarsiutigalugu piniartut pingaarnerpaatillugit oqaloqatigineqarput, umimmaat Kangerlussuarmiittut ikilisarlugit piniarneqarnissaat iluaqutigineqarnissaallu pillugu.

Arctic Green Food-ip Kangerlussuarmi tunitsivianut sapinngisamik amerlanerpaanik tunisisoqarsinnaanissaa siunertarineqarpoq. Arctic Green Food-ip tunisassianik ingerlatsisui saaffigineqassapput, umimmaat neqaanik amerlasuunik tunisisoqarsinnaanera pillugu pilersaarusiornissaq siunertaralugu.

Kangerlussuarmi umimmaat ikilisarniarlugit piniariaatsinik nutaanik atuutilersitsisoqarniarpoq. Takornariat akiliisillugit piniartinneqartarnerannut atatillugu, pisissit atorlugit umimmanniartitsisarneq nutaatut atuutsilersinniarneqartoq, Piniarnermut naalakkersuisoq Ane Hansen oqarpoq.

Inuussutissarsiutigalugu aamma sunngiffimmi piniartut novembarip aallaqqaataata tungaanut ukiaanerani umimmanniarsinnaatitaalerput. Inuussutissarsiutigalugu piniartut ukiuunerani umimmanniartarnerat januaarip qulinganni ammarneqassaaq marsip qulingata tungaanut umimmanniartoqarsinnaassalluni.