Puto Kiviup asasaa Ukrainemut aallarpoq: Suli uumanersoq eqqarsaatigiuaannarpara
Apersuineq aallartinngitsorluunniit isai immatserput. Puto Kivioq uisoreriaruni qullii unitsitassajunnaarlutik kuulissapput. Arnaq sapiitsoq nukittuniarsarivoq. Ullorpassuarnilu taamaareerluni.
Aappaami Ukrainemiup 30-nik ukiullip Ivan Dumanovip nammineq piumassutsiminik Ukrainemut sorsuffiusumut aallarniarluni Nuuk eqqissinartoq martsip ulluisa aqqarnani qimammaguli nukittuniaannavissimavoq.
AAMMA ATUARUK Ivan Ukrainimeersoq angerlapallakkusuttoq: Anaanaga ataatalu isumannaatsumukassapput
Tassami Ivan Dumanov Ukrainemi Kyiviminngaanneerpoq, nunalu taanna Ruslandimit februaarip ulluisa 24-anni sakkutuulerneqarpoq qaartartullu igeriunneqartualerlutik.
Ullormit tassanngaanniilli Ivan Dumanovip angerlarnissani aalajangiuppaa, angajoqqaanimi Ruslandip præsidentiata Putinip qaartartui nigorlugit isumannaatsumukaanniarpai.
Ivan Dumanov angajoqqaami illoqarfianni Kyivimiippoq. Kisianni angajoqqaavi Ukrainep kujasissuanut qimaasimammata suli takunnngilai.
Puto Kiviullu asasani iperassallugu qaartartumeerfiusumut aallartissallugu ajornakusoortissimagaluaqalugu, aalajangernera paasisinnaalluarlugu tapersersorpaa. Eqqarsaateqarpassuilli kaaviinnartut unitsinngilai.
- Taamaallaat Ivanip neriorsuutigivaa sianigeqqissaassalluni ajunngikkunilu angerlassalluni.
- Apeqqutit akineqarsinnaanngitsut apeqqutigisaqattaarakkit, soorlu naluara takoqqissanersugut. Angerlaqqissava? Qaqugu angerlassava? Tusartuaannassaagut? Apeqqutikka kimilluunniit akineqarsinnaanngillat, Puto Kivioq qiassamik tupeqqalluni oqarpoq.
Nipaata nanertuutaa artulerpaa qulliillu utaqqiinnartut kuuginnalerput.
Asasara, inuulluarit
Ivan Dumanovip naammagittarnera inummut nammatassaanngingajatsumik misilittarneqarpoq, Ukrainemimi sorsunneq aallartinniariartoq erngerluni nunani illersoriartorlugu angerlartariaqarluni ilisimareerpaa.
Kalaallit Nunaalli imaaliallaannaq qimassinnaanngilaa, passiatami atuuffissami ullua qaangiuteqqammermat. Ullorpassuit utaqqereerluni kiisami passini tiguaa, kiisamilu aallarsinnanngorluni.
Tallimanngornermi martsip ulluisa aqqarnani aallartussanngorpoq, tassalu asaqatigiinnut avissaarfissaq nalliulluni.
- Taava tassa aallariartorpoq. Iluaallaatiginikooqaara timmisartoq minutsinik 15-inik kinguarmat. Uannut minutsit 15-init isumalerujussuanngorlutik. Minutsini 15-ini ilageqqissinnaalerpara. Taava timmisartoq ilaaffissaa piareermat, mikrofonikkut oqaatigineqarpoq ikiartorfissaa piareertoq, aallartussat aallariartornissaminnut piareeqquneqarlutik. Tusaallugu naluara qanoq qisuariassanerlunga, Puto Kivioq KNR-imut oqarpoq.
AAMMA ATUARUK Ukrainemiut ti miliuunit qimaapput
- Eqqarsaat uaniinnerugami 'naggammik takunerpara? Naggammik attornerpara?' Taamaammat taanna eqqarsaat pigilerlugu qiarsuaarlunga aallartikkama, timmisartumullu ikiartortoq igalaakkut isiginnaarpara.
- Nassuiaruminaappoq timmisartumut ikiartortoq, tassa naggammik takullugu, tassalu uanga kisimiillunga ilagisaqarnangalu, Puto Kivioq qullini kuuttut oqarpoq.
Suli uumanerluni?
Ullut makku Puto Kiviumut imaannaanatillu artornaqaat. Tassami eqqarsaatai kaaviinnarput. – eqqarsaatit ikinnerpaaginnaat naassallugit artunngisaat.
- Facebook ammallattaartarpara qanga kingullermik onlineqqasimanersoq takuniarlugu. Akunneq ataaseq qaangiussimagaangat, tassa isumaqarpoq suli ajorani uumasoq.
- Allakkaangat iluaallattorujussuusarpunga, taamaammat taakku misigissutsikka nassuiaruminaatsut akineqartuusisarput. Tassami ajorani suli uumasimassaaq.
- Ulluni kingullerni sinnarlioqattaangaatsiarpunga aappara suli ajunnginnersoq, suli uumanersoq eqqarsaatiginermik.
- Taamaammat sivitsulaartumi tutsaqanngikkaangat nalusarpara uumanersoq. Sillimarujoortuartarpunga tusarnissaanut imaluunniit tutsaqarnissaanut.
AAMMA ATUARUK Tuluit isertortumik paasiniaasartui: Russit tiguaaniarnerat unittoorpoq
Ukrainemut attavilukkaluartoq Ivan Dumanov aallarmalli aappariit facetimernissaminnut periarfissaqartarput.
- Aperigaangakku qanoq innersoq ajunnginnerarluni oqartarpoq, kisianni isikkulungaarmat isukkuatigut takusinnaavara ajortoq. Nikallungasoq takusinnaasarpara, Puto Kivioq aappani pillugu oqarpoq.
Siunissaq kialuunniit ilisimanngilaa
Aggersut kialluunniit ilisimanngilai. Susoqassaneranillu apeqqummut akiuminaakkaluaqisumut Puto Kivioq paasinnippalulluni qungujualaannguarluni akivoq:
- Tassa taanna nalunartua. Taamak ulorianartumiitsigaluni naluaa ajorani angerlaqqissanerluni imaluunniit ajorani uumaannassanerluni. Taamaammat naluarput qaqugu angerlassanersoq, aamma pilersaaruteqanngilaq qaqugorpiaq angerlassanersoq.
- Artornarpoq. Aamma kikkunnulluuniit misigiqqunanngitsorujussuugaluarpoq. Kisianni ta ssa nalaatassarput taamaassimavoq, Puto Kivioq oqarpoq.
Puto Kiviup ilummut anersaarluni nukissami tamaasa katersorpasippai. Kisianni qullii suli taakkuupput.