Tuluit isertortumik paasiniaasartui: Russit tiguaaniarnerat unittoorpoq
![](/sites/default/files/styles/image_934x467/public/article_images/2022031708373550_1000.jpg?itok=hjlzSgI5)
Russit Ukrainemik tiguaaniarnerat ataatsimut isigalugu sorsuffinni tamani unittooqqavoq. Russit sakkutuui annaasaqaqaat annikinnerpaaginnarmillu siuariarsimallutik nunakkut, immakkut aamma silaannakkut ullup unnuallu kingulliup ingerlanerani, sisamanngornermi tuluit isertortumik paasiniaasartuisa nalunaarutigaat.
- Ukrainemiut akiuunnerminni suli malartitassaanngillat ataqatigiissaarluagaallunilu, tuluit illersornissamut ministereqarfiat Ukrainemi sakkutooqarnikkut ineriartorneq pillugu oqarpoq.
- Ukrainep nunataata annerpaartaa – illoqarfiit annerit tamaasa ilanngullugit – suli Ukrainemiunit tigunmmineqarpoq, ministereqarfik tuluit isertortumik paasiniaasartuisa nalunaarutaat naapertorlugu nangippoq.
Ilutigalugu nunat assigiinngitsut russit tiguaaniarnerannik kmaatiginninnerat annertusiartorpoq, inuinnarnik saassussinermik nalunaarutit takkussuutsillugit. Ameriakmiut Ukrainemiullu atorfilittaat naapertorlugit inuinnaat iffiarsiniarlutik tulleriiaarlutik utaqqisut aamma inuinnaat isiginnaartitsisarfimmiittut saassunneqarsimapput.
Amerikamiut præsidentiata Joe Bidenip russit pisortaat Vladimir Putin oqaaseqarnermini sorsunnermi pinerluttuliortutut taavaa, taannalu Kremimit oqaasertalerneqarpoq tassaasoq "isumakkeerfigineqarsinnaanngitsoq". Ruslandip suli aalajangiusimavaa Ukrainemi "sakkutooqarnikkut immikkut ittumik iliuuseqarneq" pilersaarutit malillugit ingerlasoq.
Illoqarfiit annersaasa arlaannaalluunniit Moskvap suli tiguanngilaa. Milliuuninit pingasunit amerlanerit qimaapput tuusintilikkaallu toqutaareerlutik.