Ukrainemiut ti miliuunit qimaapput

Ukrainemi sorsunneq aallartimmalli inuit ti miliuunit angerlarsimaffitsik qimassimavaat.
FN-imit nalunaarutigineqartut naapertorlugit Ukrainemi qimaasut amerlanerit arnaapput meeqqallu, angutit nuna qimassanngikaat peqquneqaramik, Assi © : Clodagh Kilcoyne / Reuters / Ritzau Scanpix
Allattoq Ritzau
marsip 20-at 2022 17:20
Nutserisoq Jaaku Lyberth

Russit Ukrainemut februaarip ulluisa 24-anni isaammatali Ukrainemiut sisamaagaangata ataaseq nunamut allamut Ukrainemiluunniit sumiiffinnut allanut qimaasarput.

Naalagaaffiit Peqatigiit qimaasut pillugit pisortaat Filippo Grandi attaveqatigiittarfimmi Twitterimi sapaammi allappoq Ukrainemi sorsunneq aallartimmalli inuit ti miliuunit angerlarsimaffitsik qimassimagaat.

AAMMA ATUARUK Scholz-ip Putin saakkuaakkunnaaqqullugu isumaqatigiinniarnerillu nangeqqullugit qinnuigaa

Tassalu Ukraine innuttaasut 44 miliuuniusut sisamararterutingajaat qimaasimapput.

Russit Ukrainemut isaammatali Ukrainemi illoqarfiit arlaqartut sakkortuunik qaartartumeeriffigineqarput.

Sakkortuumik qaartartumeerfigineqarput

Illoqarfiit sakkortuumik qaartartumeeriffigineqartut ilagaat Mariupol taanna Ukrainep kujataata kangisinnerusortaaniippoq umiarsualiveqarfiulluni, nunap immikkoortuani Donetskimiilluni.

Ukraine-mi oqartussaasut oqarnerat naapertorlugu, Russit qaartartumik illoqarfimmut Mariupolimut sapaammi saassussineranni meeqqanut napparsimmavik, isiginnaartitsisarfik eqqumiitsuliornermullu ilinniarfik eqqorneqarsimasut.

Sakkutuujunngitsunut saassussisimanatik russit oqarput.

AAMMA ATUARUK EU Ruslandimut nutaamik kinguneqartitsinermi mattussinissanik piareertitaqartoq

Maanna sapaatit akunneri sisamat qaangiupput Rusland Ukrainemut saassilluni allartimmat