Scholz-ip Putin saakkuaakkunnaaqqullugu isumaqatigiinniarnerillu nangeqqullugit qinnuigaa

Tallimanngornermi Tysklandip forbundskansleriata Olaf Scholz-ip Ruslandip præsidentia Vladimir Putin oqarasuaatikkut sianerfigaa Ukrainemilu sakkuaakkunnaarnissaq aamma pissutsit inunnut tunngasut pitsaanerulerseqqullugit kaammatuutigalugu

Aamma isumaqatigiinniarnikkut aaqqiinissaq annertunerusumik sulissutigeqqullugu kaammatuutigaa. 

Scholzimik oqaloqateqarnermi Moskva aaqqiinissamik sulissuteqarnissamut piareeqqasoq Putin oqarpoq. Ukrainemiut oqartussaat kinguarsaanerarpai "eqqaaneqarsinnaasumik sutigut tamatigut – ilaatigut piviusorsiunnginneruleraluttuinnartunik siunnersuuteqarlutik". Putinip oqaaseqartartua Dmitrij Peskov oqaloqatigeereernerup kingornatigut oqarpoq.

- Kisianni minnerunngitsumik Rusland aaqqiissuteqarnissamik suliniuteqarnermik nangitsinissamut piareeqqavoq, ajornartorsiutinik passussinissamut tunngavini aalajaatsoq ilisimaneqarluartoq atorlugu, oqarpoq.

Peskov-ip Putinip Scholzillu akornanni oqaloqatigiinneq "sakkortuutut" taavaa, erseqqissarluguli atassuteqarfiit taamaattut suli pisariaqartinneqartut.

Nangillugu Putinip oqaaseqartartua oqarpoq isumaqatigiinnissamut atsiorneqarsinnaasumik siunnersuut pillugu siusippallaarujussuartoq.

-Taamaallaat aalajngersinnaavara russir aallartitaat massakkut pisuninngaanniit sukkanerujussuarmik sulerusussuseqartut. Ajoraluartumilli Ukrainemiut massakkut pisunit sukkanerusumik ingerlasoqarnissaanut piumassuseqanngillat, oqarpoq.

Putinip  forbundskanslerimut erseqqissarpaa russit sakkutuui "sapinngisartik tamakkerlugu" inuinnaat annanniaraat – aamma inuinnarnut illersukkamik aqqutissatigoortinnerisigut. Russit oqaaseqartartuisa erseqqissarpaat innutaasut  43.000-init amerlanerusut kujataa-kangiani illoqarfimmit umiarsualiveqarfimmit Mariupolimit sisamanngornermi qimarngutitinneqartut.    

Tallimanngornermi kingusinnerusukkut Putinip aamma  Frankrigip  præsidentia Emmanuel Macron oqarsuaatikkut oqaloqatigissavaa.