EU Ruslandimut nutaamik kinguneqartitsinermi mattussinissanik piareertitaqartoq

Ruslandip sakkussiorfii, sisammik tunisassiorfii aamma nukissiuuteqarfii kinguneqartitsinermi nutaami eqqorniarneqarput. Aamma nioqqutissat inuulluarniutit eqqorneqarput
Kinguneqartitsinertut mattussiffigineqartut tassaapput ilaatigut Ruslandip sakkussiorfii, sisammik tunisassiorfii amma nukissaqarniarnermut nutaamik aningaasaliinerit.
Allattoq Ritzau
marsip 15-at 2022 10:22
Nutserisoq Per Rosing

Ukrainemi sorsunnerup ulluisa 19-ssaanni EU Ruslandimut kinguneqartitsinermi mattussinissanik sisamassaanik nutaanik aalajangiivoq.  EU-Kommissionenip tamanna nalunaarutigaa .

Kinguneqartitsinertut mattussiffigineqartut tassaapput ilaatigut Ruslandip sakkussiorfii, sisammik tunisassiorfii amma russit nukissaqarniarnerannut nutaamik aningaasaliinerit.

Taakkua saniatigut nioqqutissat inuulluarniutit soorlu biilit aamma pinnersaatit akisuut EU-meersut Ruslandimut nioqqutigineqaqqusaajunnaarput Ruslandimi pisoorsuit eqqorniarlugit.

Russit pisoorsuit ingerlatsiviillu russit naalakkersuisuinut attuumassuteqartut mattunneqarnerat amma annertusineqarpoq.

Mattussinerit tassaapput Ruslandip Ukrainemut inuttaanullu "peqqarniitsumik saassussinera"-nik kinguneqartitsinerit, EU-Kommissionenip tusagassiuutinut nalunaarutaani allassimavoq.

EU nunarsuarmilu niueqatigiinnermi suleqatigiiffik WTO aamma isumaqatigiipput Ruslandip manna tikillugu WTO-mi ilaasortaanermini inissimanermigut ajunngitsorsiassani pisarunnaassagai.

Reuter naapertorlugu russit nioqqutissiaasa pillaataasumik akitsuusernissaat ammaaffigineqassaaq, taamalu Rusland Nordkoreamut Iranimullu sanilliunneqassalluni.   

Kinguneqartitsilluni mattussinerit taakku Kreml-imik aningaasaqarnikkut tatisineq annertusisissavaa Ruslandillu Ukrainemik sakkutuuliinerminik aningaasaliisinnaanera ajoqusissallugu.

- Kinguneqartitsilluni mattussinerit nunat assigiinngitsut akornanni suleqatigisatsinnik, pingaartumik USA-mik, ataqatigiissaaqatigiinneqarput, EU-Kommissionenip tusagassiuutinut nalunaarutaani allassimavoq.

Dansk Industri-mi underdirektøri Peter Thagesen naliliivoq kinguneqartitsilluni mattussinerit sunniuteqassasut:

- Kinguneqartitsilluni mattussinerit nutaat marlunngormnermi atuutilersut pinngitsoornatik russit aningaasaqarnerat annertunerusumik tatissavaat. Nioqqutissanik atortussiassanillu pingaarutilinnik arlalippassuarnik annissuinissaq eqqussuinissarlu ajornartilissavaat, Peter Thagesen oqarpoq.

Kisianni aamma malugeqquaa kinguneqartitsilluni mattussinerit aamma akit qaffannerisigut nioqqutissanik aamma atortussiassanik amigaateqalernikkut EU-mi ingerlatsiviit atuisartullu eqqussagaat.

Aamma atuaruk