Putinip Zelenskyj-llu qanittukkut ataatsimeeqatigiinnissaat Erdoganip neriuutigaa
Marlunngornermi Tyrkiap præsidentiata Recep Tayyip Erdoganip Ruslandip Ukrainellu akornanni isumaqatigiinniarnissamut ataatsimiinnerit nutaat Istanbul-imi aallarnerpai.
Tyrkia Ruslandimut immikkut atassuteqarpoq aamma qangaaniilli Ukraine iligisimallugu. Ataatsimiinnerit aallartisarneranni Erdogan oqarpoq nunat taakku marluk tamarmik "aarleqquteqarnissamut pissutissaqartut".
Ruslandimit Ukrainemillu aarlartitat illussaarsuarmi Dolmabahce-miipput, taannalu siornatigut som Osmannit Naalagaaffianni pingarnerpaatut aqutsiveqarfiusimavoq.
Erdogan isumaqatigiinniartitaallutik aallartitanut oqalugiarnermini tv-kkut aallakaatinneqartumi oqarpoq siuariarnerit Ruslandip aamma Ukrainep præsidentiisa Vladimir Putinip aamma Volodymyr Zelenskyj-p ataatsimiinnissaannik aqqutissiuissasut.
- Aalajangersimasunik angusaqarfiusunik isumaqatigiinniarfissanngorpoq, Tyrkiamiut siuttuat oqarpoq piaarnerpaamillu sakkuaakkunnaarnissaq kaammattuutigalugu:
- Illugiit tamarmiik immikkut aalajangissavaat pisoq alianaqisoq taanna unitsinneqassappat.
Erdogan sapaatip akunnerani matumani siusinnerusukkut oqarpoq Ruslandip Ukrainellu isumaqatigiinniarnerni immikkoortut arfinillit isumaqatigiissutigisimagaat. Tassaapput Ukraine Natomit immikkuussasoq, russirt oqaasiisa Ukrainemi atorneqarnerat, sakkukillisaaneq aamma isumannaannissamut qularnaqaveeqqutit.
Marlunngornermi Ukraine neriuuteqarpoq ikiuiniarlui aqqutissanik pingasunik aammaasinnaanissaminut, inuinnaat illoqarfinnit unngussaasunit qimaasinnaaqqullugit. Taakkununnga ilanngunneqarpoq inuinnarnut nammineq biiliminnik illoqarfimmit kujataani umiarsualiveqarfimmit unngussasumit Mariupolimit qimaallutik biiliminnik aallarusuttut aqqutigisinnaasaat isumannaatsoq, The Guardian allappoq.
Ulloq 10. marsi Tyrkia russit Ukrainemik sakkutuuliinerisa kingornatigut nunat taakku marluk nunanut allanut ministeriinut siullermeersumik ataatsimiisitsisuuvoq.
Sapaatip akunnerini marlunni illua’tungeriit ataatsimiinnerisa siullersaraat, tusarfiillu isumaqatigiinniarnernut qanittut sisamat The Financial Timesimut oqarput, Ruslandip Ukrainep "nazistiunnaarnissaa" piumasariunnaaraa.
Nalunaarusiaq naapertorlugu russit aamma piareersimapput Ukrainep EU-mut ilaasortaanissaata akuerinissaanut, sakkutooqarneq ilanngunneqassanngippat.
Isumaqatigiinniarnermi sapinngisamik piaarnerpaamik eqqissineqarnissaa Ukrainep anguniarpaa, kisianni Ukrainep nunartaata ilai imaluunniit nammineerneq akiginagit.
- Inuit, nunatat imaluunniit namminnerneq akiginianngilavut, Ukrainemiut nunanut ministeriat oqarpoq.
