Putinip nunap immikkoortuini qinersinermi siuariaateqarnissi neriuutigigaa

Sapaatip akunnerata naanerani uani russit qinersisartui taasisussanngorput inernissaalu imaassinnaalluarpoq tupaallatitserujussuarsinnaarataannaasoq, taama nutaarsiassanik siammarterivik Reuters allappoq.

Ruslandimili politikkikkut qullersat tapersersorneqartutut naatsorsuuteqarput præsidentimillu Vladimir Putinimik tatiginnittoqartoq upperalugu.

Qinersineq tallimanngornermiit sapaatip tungaanut pisussaavoq, matumani guvernørit 21-t Ruslandip nunaani sumiiffinni arlalinneersut taaneqartussaallutik.

Aammali Ukrainemiittut sumiiffiit sisamat taasiffiussapput tassaasut Donetsk, Kherson, Luhansk aamma Zaporizjzja.

Taakku sumiiffiit sisamat sorsuttoqarnerani matumani Ruslandimut atasutut Ruslandimulluunniit tapersersuisutut nalunaarutigineqartarput.

Ukrainep aammalumi nunat killiit allat Ruslandip piumasaqaatai suusupagaat.

Ukiup aappaata qeqqani sorsuttoqarnerani Putinillu naalakkersuinerani Ruslandimi politikkikkut illuatungiliuttut sukateriffigineqarsimapput.

Illuatungiliuttut nuimasut arlallit parnaarussaasarput imaluunniit nunagisaminniit qimaasarlutik.

Uanilu weekendtimi qinersinissami illuatungiliuttut arlallit, matumani soorlu aamma inatsisartuni ilaasortat qineqqusaarlutik sassarnissaraluat pinngitsoortinneqarsimavoq.

Taamaattumik russit qinersisartuisa taasinissaat siammasippallaarnaviarunanngimmat pissanngataavallaarsinnaarpianngilarluunniit.