Putinimik tigusarinneqqusineq Ruslandimut sorsukkumanertut Medvedevip isigigaa

Ruslandip præsidentia, Vladimir Putin, nunani allaniitsilluni tigusarineqassappat, tamanna sorsukkumanermut nalunaarutaassaaq. Putinip tigusarineqarnissaa nunat tamalaat pinerluuteqarsimasunut eqqartuussiviata, International Criminal Courtip, peqqussutigaa.

Ruslandip isumannaallisaanermut ataatsimiititaliaata siulittaasuata tullia, Dmitrij Medvedev, taama oqarpoq.

- Takorlooriartigu, taamatullu soorunami pisoqarnavianngilaq, takorlooriartigulli taama pisoqarsimasoq. Atomimik qaartartorsuaqartumi præsidentiusoq assersuutigalugu Tysklandiliarsimasoq tigusarineqartorlu, Dmityrij Medvedev oqarpoq.

- Tamanna qanoq isigineqassava? Ruslandimut sorsukkumanertut tamanna isigisassaavoq. Ruslandimi 2008-miit 2012-ip tungaanut præsidentiusoq Medvedev ilaatigut oqarpoq.

Ruslandip præsidentia Tysklandip pigisaanukassagaluarpat, Tysklandip International Criminal Courtip peqqussutaanik eqquutsitsinissaanik, Tysklandip inatsisinut atuutsitsinermut ministeriata Marco Buschmannip qanittukkut oqaasiinut Dmitrij Medvedev innersuussuteqarunarpoq.

Ukrainemi sorsuttoqarnera pissutigalugu Putinip tigusarineqarnissaa, International Criminal Courtip marsip ulluisa 17-ianni peqqussutigaa.

Vladimir Putin Ukrainemi sorsunnermi pinerluuteqarsimasutut nunat tamalaat pinerluuteqarsimasunut eqqartuussiviannit pasineqarpoq.