Putin tigusarineqaqqusaareernermini nunanut allanut siullerpaamik angalasoq
Ruslandip præsidentia Vladimir Putin Kirgisistanimut tikittoq, Ruslandimi naalagaaffiup nutaarsiassaqartitsivii ullaaq manna allapput.
Vladimir Putinip tigusarineqarnissaa sorsunnermi pinerluuteqarsimasunut nunat tamalaat eqqartuussiviata marsimi naalakkiutigereeraalu, Putin nunanut allanut siullerpaamik angalavoq.
Russit præsidentiat nunamut tummassappat tigusarissagaat, parnaarusseqqusisut sorsunnermik pinerluuteqarsimasunut nunat tamalaat eqqartuussivianni ilaasortanut naalakkiipput.
Putinip nunani allani tigusarineqaratarsinnaanera inatsisinik tunngavissaqanngitsoq, russit namminneq allaaserereerpaat.
Kirgisistanimi, sorsunnermi pinerluuteqarsimasunut nunat tamalaat eqqartuussivianni ilaasortaanngitsumi, præsidentiusup Putin ataatsimeeqatigissavaa, kiisalu Putinip qanittumik peqatigisaa belarusiskit præsidentiat, Aleksandr Lukasjenko, naalagaaffiit imminnut naalakkersortut peqatigiit naalakkersuisuunerisa ataatsimiinneranni aamma peqataassaaq.
Putinikkut Ukraine februaarimi 2022-mi isaaffigigamikkulli Putinip Rusland ikittoriaannarluni qimannikuuaa.
Putin taamaallaat Ukrainep ilaanut tunngavissaqanngitsumik sakkutuulerfiginikuusaminut ukioq manna aallarnikuuvoq. Belarus aamma Kirgisistan siorna decembarimiit angalaffiginikuusai kingusinnerpaapput.
Putinip nunanut allanut angalanissaminut maanna tassa kajumissuseqalersimagunarpoq.
Ruslandip, sorsunnermi pinerluuteqarsimasunut nunat tamalaat eqqartuussivianni ilaasortaanngitsunut, Korea Avannarlermut Kinamullu, angalanissani aamma aaqqissuuppaa.
