Putin: Polen Letlandilu Ruslandip saassunnavianngilai
Polen Letlandilu Ruslandip saassunnavianngikkai, Ruslandip præsidentiata Vladimir Putinip erseqqissaatigaa.
USA-mi tusagassiortumit Tucker Carlsonimit apersorneqarluni taama oqarpoq:
- Polenip Rusland aatsaat saassuppagu taamaliortoqarumaarpoq. Polen uagutsinnut soqutiginaateqanngilaq, Letland aamma, nunaluunniit alla. Sooq saassussavagut? Soqutiginngilarput. Taamaaliortoqanngisaannassaaq, Putin oqarpoq.
Putinip marlunngornermi apersorneqarnera sisamanngornermi saqqummersinneqarpoq.
Ruslandip Ukraine 2022-mi februaarimi saassutilermaguli Ruslandip præsidentia, Putin, tusagassiortumit nunat killiit ilaanneersumit aatsaat apeqqarissaarfigineqarpoq.
Tucker Carlson, USA-mi tv-qarfimmi talerperliunianik tapersersuisumi Fox Newsimi aallakaatitassiami "Tucker Carlson Tonight"-imi ukiorpaalunni aallakaatitassiortarnikuuvoq.
Carlson USA-mi talerperliunianik tapersersuisuuvoq, takorluukkanillu assigiinngitsunik ilaatigut siammarteriniaqataasarluni, USA-llu præsidenterisimasaanik Donald Trumpimik tapersersuisuulluni.
Ruslandillu Ukrainemi sorsunnermi ajorsarnissaa takorloorsinnaanngikkini, Vladimir Putinip apersorneqarnermini oqaatigaa:
- Ruslandip sorsunnermi ajorsarumaarnera oqaatigineqartarsimavoq. Uanga nammineq isummanni taama pisoqarsinnaanngilaq. Rusland ajorsarnavianngilaq, Putin oqarpoq.
