Putin Kim Jong-unilu nereqatigiillutillu ataatsimeeqatigiissasut
![](/sites/default/files/styles/image_934x467/public/2023-09/20230912-093410-L-3300x2199ma.jpg?itok=mZ4FyBB1)
Nunat marluk aallartitaasa pisortatigoortumik ataatsimiinnissaat, Putinillu Kim Jong-unillu aamma naapeqatigiinnissaat.
Tassa Korea Avannarliup naalakkersuinikkut siuttuata, Kim Jong-unip, Ruslandimi tikeraarneranut atatillugu pisussatut pilersaarutigineqartut ilaat.
Ruslandip præsidentiata Vladimir Putinip oqaaseqartitaa, Dmitrij Peskov, taama oqartoq, Ruslandimi nutaarsiassaqartitsiviup Tassip marlunngornermi allaaseraa.
Kim Jong-un, Korea Avannarliup illoqarfiisa pingaarnersaannit Pyongyangimit sapaatiummat aallartoq, Korea Avannarlermi nutaarsiassaqartitsiviit allaaseraat. Korea Avannarliup illersornissaqarfiani aqutsisut, sakkussanillu tunisassiornermi aqutsisut ilaat Kim Jong-unip qimuttuitsuinut ilaasut nutaarsiassaqartitsiviup Reutersip allaaseraa.
Dmitrij Peskovip ataatsimiinnissamut tunngatillugu paasissutissat sukumiinerusut saqqummiukkumanngilai:
- Nunat marluk akornanni suleqatigiissutigineqarsinnaasut, niueqatigiinneq, aningaasarsiornerlu, kulturikkullu avitseqatigiinneq pingaarnertut eqqartorneqassapput, Peskov Tassimut oqarpoq nangillunilu:
- Pingaarutilinnut arlalinnut tunngasuni nunavut suleqatigiissuteqarniarput, tamakkuali suunersut saqqummiunneqarnavinngilaq nalunaarutigineqarnatilluunniit, taanna oqarpoq.