Kim Jong-un Putinilu ulluni tulliuttuni ataatsimeeqatigiissasut
![](/sites/default/files/styles/image_934x467/public/2023-09/20230911-122611-L-2915x2186ma.jpg?itok=1uqJPVtb)
Korea Avannarliup siuttua, Kim Jong-un, Ruslandip præsidentianik, Vladimir Putinimik, ataatsimeeqateqariartorluni maanna Ruslandiliarpoq.
Korea Kujallermi tv-qarfik, YTN, Korea Kujallermi naalakkersuisunit tusarfiit atersineqanngitsut aallaavigalugit ataasinngornermi taama nalunaaruteqarpoq.
Kim Jong-un qimuttuitsorluni angalasoq YTN-ip oqaatigaa, marlunngornermilu ataatsimiittoqarnissaa oqaatigineqarluni.
Kim Jong-un Ruslandip kangisissuanut ulluni tulliuttuni tikeraassamaartoq, Ruslandimi nutaarsiassaqartitsiviup Interfaxip ataasinngornermi allaaseraa.
Kim Jong-un Vladimir Putinilu ataatsimiilersut, USA-mi aviisip The New York Timesip septembarip ulluisa sisamaanni allaaseraa, sakkussianik tunisisoqarnissaa ilaatigut oqaatigineqarluni. USA-mi oqartussanit tusarfiit atiminnik tunniusserusunngitsut The New York Timesimit oqaloqatigineqarsimapput.
Korea Avannarleq Ruslandilu illersornissaqarfikkut suleqatigiinniartut, USA-mi tusarfiit ilaannit oqaatigineqarpoq.
Kim Jong-un Korea Avannarlermit ukiuni sisamani angalanikuunani maanna tassa Ruslandilialerunarpoq. Kim Jong-un coronavirusip tuniluutilertornerata kingorna nunanut allanut siullerpaamik angalalerpoq.