Pujortartarneq suli oqallisaaqaaq
Pujortartarneq Danmarkimi oqallisaaqaaq, pujortartarnerlu pillugu maleruagassat nutaat aappaagu apriilip ulluisa aallaqqaataanni atuutilersussat malissanerlugit suliffeqarfiit tamarmik immikkut suli aalajangertassammassuk naalakkersuisut isornartorsiorneqangaatsiarput.
Nappaassuaq kræfti akiorniarlugu suleqatigiiffik, Kræftens Bekæmpelse, aamma Pualluttut Danmarkimi peqatigiiffiat, Danmarks Lungeforening, sakkortuumik qisuariarput.
- Pujortartarnerup inerteqqutaalivinnginnera pissutigalugu pujortartartut pujortarnerlu ajortut nalornisittorujussuusarpaat. Isornarnerpaavorlu nammineq immikkut allaffillit allaffimminni pujortarsinnaatitaammata, tassami pujoq pujortartanngitsunut navianartorujussuuvoq, taama oqarpoq, Pualluttut peqatigiiffianni pisortaaneq, Charlotte Fuglsang.
Nutaamik isumaqatigiissuteqartut tassaapput Danmarkimi naalakkersuisut Folketingimilu amerlanerussuteqarluartut – taamaallaat De Radikalit pinnagit.
Pisortat namminersortullu suliffeqarfiutaanni pujortartarnerup inerteqqutaalernissaa ippassaq unnukkut isumaqatigiissutigineqarpoq. Taamaattorli isumaqatigiissut killeqarpoq, ininimmi illuaqqanillu pujortarfiusinnaasussanik pilersitsisoqassaaq, allaffiillu kisermaassat aamma pujortarfiusinnaassallutik.
