Pujortagassaaleqineq Naalakkersuisut isummerfigissavaat

Qeqertarsuarmiut sapaatit akunneri pingasut Look Mentholit kisiisa Pilersuisup pisiniarfiani qanittumi pisiassaraat. Maanna Inatsisartuni ilaasortap Andreas Uldumip paaserusuppaa sullissinissamik isumaqatigiissut Pilersuisup unioqqutissimaneraa.
Allattoq Noah Mølgaard
aggustip 01-at 2012 04:57

Pilersuisup Qeqertarsuarmi pisiniarfiani kukkusoqarneratigut Qeqertarsuarmiut qanittumi Look Mentholit pujortagassatuaraat. Kioskiutillit namminneq Aasiannut Prince-nik assigisaannillu pisiniariarlutik poortat ataatsit 80 koruunilersorlugit tuniniarpaat.

Kisianni ilumoorsinnaanngilaq Pilersuisoq sullissinissamik isumaqatigiissuteqareerluni pisiassanik aalajangersimasunik nunguutsisarnera, Demokratineersoq Andreas Uldum isumaqarpoq.

Taamaammat paragraf 37 naapertorlugu Naalakkersuisunut apeqquteqarpoq Pilersuisup sullissinissamut isumaqatigiissut unioqqutittarsimaneraa taamaassimappallu qanoq akulikitsigisumik tamanna pisarnersoq. Aammattaaq paaserusuppaa unioqqutitsisoqarsimappat tamanna Pilersuisumut kinguneqassanersoq.

Andreas Uldumip erseqqissarpaa nioqqutissat nunguttut cigaretiunerat uani pingaarnerunngitsoq. Tunngaviusumilli paaserusuppaa nioqqutissanik aalajangersimasunik Pilersuisoq nunguutsigaangami sullissinissamik isumaqatigiissummik unioqqutitsisarnersoq.