Pujoq, motooriiarneq malissuillu: Umiatsiaaqqat qajartortullu annaanneqartariaqarsimasut
Upalungaarsimasut pingasunut annaassiartortariaqarsimapput. Kalaallit Nunaanni politiit tusagassiuutinut taama nalunaarput.
Umiatsiaaraq Nanortallip Alluitsup Paallu akornanni pujornera peqqutigalugu ulorianartorsiorlutik siullertut nalunaaruteqarput. Umiatsiaaqqami radioqaratillu GPS-eqanngilaq, orsussaarullunilu motoorip bateeria imaarutilersimasoq, politiit allapput.
AAMMA ATUARUK Sikunerata uuliakkoortoqarsinnaaneranut misissuineq ajornakusoortikkaa
Sinerissami nakkutilliissut Thetis, politiit angallataat sumiiffimmilu innuttaasut umiatsiaaqqamut ajutooqqasumut ikiuukkiartorput, pujornerali sikoqarneralu unammillernarsimavoq.
Angallateeraq qujanartumik iputeqarmat inuttaa namminneerluni ipulluni Alluitsup Paanut ipussinnaasimavoq, ajoranilu apuulluni.
Kilisaat Targarlu annaassisut
Sisimiut kujasissortaani inuit marluk angallataata motoorianik unittoorsimallutik ikiortissarsiorlutik aappaattut nalunaaruteqarput.
Kilisaatip ungasinngisaaniittup ikiortissarsiortut tusaavai, ajunngitsullu naammattoorlugit angerlamut apuuppai.
Nuup avatinnguani qajartortoq annilaangalluni unnuk taanna aamma ikiortissarsiorpoq. Qajartoqataata qajaa kivisimasoq, inuttaalu qajartoqammi qajaanut najummatsersimasoq avammut tissukaraluttuinnarlutik nalunaaruteqarput.
AAMMA ATUARUK Folk stod på land og så trawler brænde: Vi blev forskrækkede
Politiit biilinik takkuttut innuttaasunik sissamiittunik ikiorteqarlutik sukkasuuliaq Targa, Arctic Boat Charterip pigisaa, nalaatsortumik saaqquttoq kalerippaat.
Taava politiit piumassutsimillu ikiuuttut Targamut ikipput, angallatillu inuttai ikiortigalugit qajartortut immamit mallersumiit annaallugit.
Qajartortut tamarmik immamiinnerminnit qiulersimaqaat, taamaammallu napparsimmaviliaanneqarlutik. Kissaameriaramilli ajoratik angerlarsinnaasimapput, Kalaallit Nunaanni politiit taama ilisimatitsipput.
