Sikunerata uuliakkoortoqarsinnaaneranut misissuineq ajornakusoortikkaa
Polar Aassik sapaatit akunnerata siuliani pingasunngornikkut ikuallannermi kingorna kivivoq. Issittumi Sakkutooqarfik uuliakoornermik suli nassaaqqinngilaq, taamaakkaluartoq suli nakkutiginnippoq.
- Aakkarnerit ataasiakkaat soorunami nakkutigaagut. Sumiiffiup eqqaani najugallit uuliatalimmik nassaarsimagunik, umiatsiaasa naqqi uuliaqalersimappata, uuliatalikkut ingerlaarsimappata uumasunilluunniit uuliatersimasunik takusimappata paasissutissaataasa tusarnissaat suli soqutigisorujussuuagut, Issittumi Sakkutooqarfimmi pisortaagallartoq, Dan B. Termansen, KNR-imut oqarpoq.
Uulia immami qerinikoq: Assi: Issittumi Sakkutooqarfik
Nakkutiginninneq nalileruminaatsoq
Sumiiffik sikusimavoq. Siku ilaatigut 30 centimeterit angullugit issussuseqarluni. Taamaattumik Issittumi Sakkutooqarfiup nakkutiginninnertik qanoq qularnaatsiginersoq nalileruminaatsippaa.
AAMMA ATUARUK Kilisaammit kivisumit uulia Qasigiannguit eqqaanni 4 kvadratkilometerit sinnerlugit siaruaattoq
- Tamanna qulakkeersinnaanngilarput. Taamaattumiguna innuttaasunit sumiiffimmi najugalinnit ikiorneqarnissarput pisariaqartikkipput. Timmisartumit nakkutiginera aamma ajornakusoortorujussuuvoq, pisortaagallartoq oqarpoq.
Polar Aassik 300 meterinik ititigisumut kivivoq. Uuliakoornerlu kvadratkilomerit sisamanut siaruartoq Issittumi Sakkutooqarfiup siusinnerusukkut nalunaarutigaa. Tamanna isikkamik arsaattarfiit 560-it angeqqatigaat.
Suli nakkutiginnikkallassasut
Sumiiffiup uuliakoortoqarsinnaaneranik nakkutigineqarnera kilisaatip kivineraniilli ingerlavoq. Suli nakkutigineqarallarnissaa Issittumi Sakkutooqarfiup ilimagaa.
- Qanoq sivisutigisumik nakkutigissanerlugu suli aalajanginngilagut. Umiarsuup kivisup uuliakoornissaa ilimanartillugu nakkutigigallassavarput, aamma qanoq annertutiginersoq malinnaaffigerusukkatsigu. Ullunili qaninerni nalilersueqqikkumaarpugut, Dan B. Termansen oqarpoq.
Issittumi Sakkutooqarfik literit qassit uuliakoortoqarsimanera iluminni nalilersorsimavaat. Inernerali suli qularnarmat pisortaagallartup maanna paasissutissiissutigerusunngilaa.
AAMMA ATUARUK Inuit nunamit kilisaat ikuallattoq isiginnaaraat: Quarsaarnarpoq
Avatangiisinut kingunerisinnaasaat nalugaat
KNR-ip avatangiisinut naalakkersuisoqarfik pisoq qanoq avatangiisinut sunniuteqarsinnaanera pillugu attaveqarfigaa. Taakkua paasissutissaateqaratik KNR-imut paasissutissiipput
- Avatangiisinut qanoq kinguneqarsinnaanera pillugu maannamut paasissutissaateqanngilagut.
Naalakkersuisoqarfiup aamma qaqugu pisumut ilisimasaqarnerulernissartik naluaa.