Inuit nunamit kilisaat ikuallattoq isiginnaaraat: Quarsaarnarpoq

- Eqqortumik oqassagaanni nanertisimanarlunilu quarsaarnarpoq, Aasianni aalisartoq piniartorlu Malik Storch, taama oqarpoq.

Taanna aalisartut piniartullu peqatigiiffianni siulittaasuuvoq.

AAMMA ATUARUK Uuliamik aniatitsineq pillugu killiffik: Mingutsitsineq siaruaatinngikkallarpoq

Polar Aassik ikuallammat Qasigiannguaniit innuttaasut nunamiit isiginnaarpaat. Taamatullu nalaataqarneq, Kommuni Qeqertalimmi kommunalbestyrelsimut ilaasortap, Kristian Jeremiassenip, ima oqaluttuaraa:

- Alianarpoq aamma misigissutsikkut soorunami eqqortippugut, pinngortitarput taamatut mingutserneqartoq takullugu. Aamma angallat ikumasoq isigalugu, annernarpoq taamatut nunaqqatigiiulluni misigisaqarneq.

Tamaani angallatip kiviffiata nalaani, upernassariartornerani aalisartut qaleralinniartartut, peqatigiiffimmi siulittaasoq oqarpoq.

- Annertuumik unittoorutaasinnaavoq, piffissaq una eqqarsaatigalugu, tappassuma nalaani aalisarfiup nalaaniingajalermat.

Qatserisartut ulluni marlunni qamisaagaluarput, iluatsinngitsumilli. Umiarsuaq ungasilliartulerpoq naggataatigullu kivilluni.

Nalaataq ilinniarfiussaaq

Issittumi Sakkutooqarfiullu umiarsuarmit kivisimasumit uulia dieseliusoq piffimmi annertuumut 4 kvadratkilometerimik isorartussuseqartumut siaruaassimasoq sisamanngornermi takuaa.

Uulia piffissami matumani immap qaani aalarluni nungukkiartorpoq.

Issittumi Sakkutooqarfiup atortorissaat immap ataani aalasunik takussutissiisinnaasoq atorlugu kilisaat immap naqqani suaniinnersoq maanna takussutissarsivaa.

Umiarsuup timitaa uulialu tassaniittoq suneqassanersut Issittumi Sakkutooqarfiup Namminersorlutik Oqartussat suleqatigalugit aalajangissavaat.

- Immap qaani ikuallattoqarnerani uuliap annerpaartaa nungussimasutut naatsorsuinermi takussutisserneqarpat taava umiarsuup timitaata sunissaanut naliliinermut tamanna ilaatinneqassaaq, Issittumi Sakkutooqarfiup pisortarigallagaa, Dan Termansen oqarpoq.

AAMMA ATUARUK Kilisaat kivinikoq: Ejnar Mikkelsen avannamukaarpoq Knud Rasmussen ikiussallugu

Taamatullu nalaataqarneq ilinniarfiusariaqartoq, kommunalbestyrelsimi ilaasortaq isumaqarpoq.

- Isigalugu ikuallattoq, qanorlu iliorsinnaanata, naak angallat angivallaanngikkaluartoq. Qanorli takornariartaatit, ilaasartaatit allallu anginerusut ajoquseraluarpata qanoq iliorsinnaanngissuserput takuarput, Kristian Jeremiassen oqarpoq, nangillunilu.

- Annertunerusumik iliuuseqartariaqarpugut. Danskit naalagaaffiat, naalakkersuisut kommunillu peqatigalugit, uani Kommuni Qeqertalik taamaallaat isigineqanngilaq kommunit tamattaalluta aaqqiisinnaaniassagatta.

Angallat ikuallalermat inuit marluk inuttaapput. Taakkunannga aarlaannaalluunniit ajoqusinngilaq.