Puisit pillugit aprilip 22-ani EU-mi aaliangiisoqassaaq
Apeqqutit tamakkua siusinnerusukkut saqqummiunneqartareerput, ilaatigut EU-mi januaarimi tusarniaasoqarnerani, 2009-mi aamma 2007-imi, tassa taamatut isummersornerit Canadamit saqqummiunneqartarmata.
Aalisarnermut, Piniarnermut Nunalerinermullu Naalakkersuisoqarfimmi pisortaq Amalie Jessen Radioaviisimut taama oqarpoq.
- Inatsisilerituut naliliineri, nunanut puisinit tunisassianik inerteqquteqalerusuttunut, juunimi EU-mi inatsisartunut qineqqusaarnermi saqqummersunut sunniuteqangaarnavianngitsutut isigaakka, tassami inerteqquteqalernissamut siunnersuummut paasinninnerit assigiinngimmata, Amalie Jessen oqarpoq.
- Puisinit tunisassiat pillugit EU-p malittarisassaasa 1983-imeersut atuutiinnarnissaat ilungersuutigaarput.
Taakkuami Kalaallit Nunaata akuersaarsinnaavai, tassami inerteqquteqarniarnermi naggueqatigiit Inuit ilaatinneqanngikkaluarpataluunniit, tamanik eqquisussaammat, aamma Nunatsinnik, Amalie Jessen oqarpoq.
- Taamaattorli nunat inatsisiliornermi, ilaatigut taaguutinik “naggueqatigiinnik Inunnik” aamma “qangaaniilli puisinniariaasitoqamik”sukatererusuttut, oqaluuserisassatut pingaartutut isigaat. Pineqartorlu pillugu sapaatip akunnerata tulliani EU-mi aalajangiiffiusumik ataatsimiitoqassaaq. Apriilip 22-ata missaani aalajangiiffiusumik taasisoqarnissaa naatsorsuutigineqarpoq.
- Taamaattumik puisinit tunisassianik EU-mi inerteqquteqalerniarneq ulluni tulliuttuni erseqqinnerusumik naliliiffigineqarsinnaalissaaq, Amalie Jessen Radioaviisimut oqarpoq.