Puisit amiinik tunisassiat pillugit Canada EU-lu imminnut qanillattortut
Nunat EU-mut ilaasortaasut 28-t puisit amiinik tunisassianik Canadameersunik 2009-mi eqqusseqqusiunnaarput, naggueqatigiillu Inuit immikkut aaqqiissuteqarfigineqaraluartut naggueqatigiit Inuit Canadameersut aammalu Nunatsinni piniartut eqqugaapput.
Puisit naggueqatigiit Inuit ileqqutoqqat malillugit pisarisartagaasa aammalu puisit Newfoundlandip avataani avaartarlugit toqorarneqartartut immikkoortinneqannginnerat ajornartorsiutaasimavoq.
Canadap EU-llu puisit amiinik nioqqutissiat Canadameersut pillugit isumaqatigiissuteqalersut Canadami Inuit siuttuata, Terry Audlap maanna oqaatigaa. Isumaqatigiissutigineqartussarli eqqusseqqusiunnaarnerup malitsigisaanik puisit amiisa akikittuaranngorsimanerinut sunniuteqassanngitsoq aamma oqaatigaa.
Rebecca Aldsworth uumasunik illersuiniaqatigiiffimmit Humane Society International Canadameersoq, canadamiut Newfoundlandip avataani puisinniartarnerup akiorniarneqarnerani siuttuusimasut ilagaat. Taassuma naggueqatigiit Inuit puisit amiinik tunisassiaannut tunngatillugu suliniutit nutaat pillugit nutaarsiassat ilassilluarpai. Naalakkersuisunut attuumassutilinnut, NGO-nut niuernermillu suliniaqatigiiffinnut pitsaalluinnarpoq, illersuiniaqatigiiffimmeersoq oqarpoq nangillunilu:
- Oqartuaannarpugummi naggueqatigiit Inuit immikkut pineqartariaqartut, Rebecca Aldsworth CBC-mut oqarpoq.
Taamatullu pisoqalernera Aldsworthip kisimi nuannaarutiginngilaa, aamma ilusilersuisartup Rannva Simonsenip Iqalunneersup tamanna nuannaarutigaa:
- Periarfissaq taanna atorluarusuppara Nunavummiunullu allanut ilaqutinngortikkusullugu. Suliffinnimmi nutaanik avammullu nioqquteqarnerulernermik nassartaqarsinnaavoq, ilusilersuisartoq oqarpoq.
