Professori: USA-mi perulluliornerit innuttaasut ilarpassuisa Trumpimut tapersersuisuunerannik ersersitsipput

USA-mi pingasunngornermi akerliussutsimik takutitsisut kongressip illorsuanut isaapput, taamaaliornerallu Amerikami innuttaasut ilarpassuisa Trumpimut tapersersuinerannik ersersitsivoq.

Aarhus Universitetimi naalagaaffiit pissusii pillugit professori, Michael Petersen, taama naliliivoq.

Taanna USA-mi politikikkut uumissuineq, anngiortumik pilersaarusioriaatsit akerliussutsimillu takutitsinerit pillugit ilisimatuujuvoq.

AAMMA ATUARUK Steen Lynge USA-mi perulluliornerit pillugit: Ernumanarpoq

Perulluliornerit inunnit ikitsunit inuiaqatigiinni immikkut ingerlasunit pilersinneqanngitsutut nalilerneqannginnissaa pingaaruteqartoq, taanna isumaqarpoq.

- Inuiaqatigiit avissaartuunnerannik ersersitsilluinnarput. Tamannalu ukiuni kingullerni ersarissiartuinnarpoq, inuiaqatigiinnimi assigiinngisitsisoqaleraluttuinnarpoq, naligiinngisitsisoqarneruleraluttuinnarpoq ineriartornermilu qimataaleraluttuinnartutut misigisimasut amerliartorlutik, Michael Bang Petersen oqarpoq.

AAMMA ATUARUK Nunani tamalaani politikerit: USA-mi pisut annilaarnarput

Sulili sakkortunerusumik perulluliortoqaqqissanersoq siulittuutigiuminaattorujussuuvoq.

- Nakuusertoqarsimatillugu pisoq sivisuumik anigorniarneqartarpoq. Nuna sajuttoq politikkimik aallaavilimmik nakuusernermut assersuutissaqqippoq. Pitinnagu kingornaluunniit sunniuttumik sakkortusiartortumik malunniuttarpoq. Taamaattoqartillugulu pisoq sakkortunersoq aatsaalluunniit aallartinnersoq ilisimanngisaannarparput, Michael Bang Petersen.

Inuit tallimat perulluliortoqarneranut atatillugu toqupput, tigusarineqartullu maannamut 68-iullutik.