Steen Lynge USA-mi perulluliornerit pillugit: Ernumanarpoq
Nunattali Amerikallu suleqatigiinnerat sunnerneqassangatissorinngilai.
- Ajuusaarnarpoq takullugu taama pisoqarnera aamma ernumanarpoq taamatut nunami oqartussaaqataanermik pingaartitsisumi taama pisoqarnera, Nunanut allanut tunngasunut naalakkersuisoq Demokratineersoq Steen Lynge, Washington D.C-mi kongressip illorsua Donald Trumpimut illersuisunit hunnorujulikkaanit pingasunngornermi ualikkut isaaffigineqarnera pillugu taama oqarpoq.
Demokraatineersup Joe Bidenip præsidentimut qinersinermi ajugaanera Kongressimi ilaasortat pisortatigoortumik uppernarsarniarlugu pifissami tassani illorsuarmiipput. Eqqissiviilliortoqalermat qinikkat qimagussorput akunnerillu arlallit aatsaat qaangiummata eqqissiviilliortut illorsuaq qimappaat.
Eqqissiviilliornermi inuit sisamat ajunaarput.
Inuit qanoq ingasattajaartigissanerminnut killingi nikissimasut, taanna isumaqarpoq. USA-milu pisut najummassimanarneruleratarsinnaanerat taassuma ernummatigaa.
Nunatta USA-llu suleqatigiinnerat sunnerneqassanngilaq
Perulluliornerit Nunatta USA-llu assersuutigalugu Pituffimmi kiffartuussinissamik isumaqatigiissut pillugu suleqatigiinnerannut sunniuteqassangatinngilai.
- Avammut suaarutiginikuuvaat massakkut Pituffik pillugu isumaqatigiinninniarnitsinni oqaatigimmassuk naqissuserlugu nunaminnut Amerikamiut nunarput illersornissamut atatillugu pingaartittorujussuullugu. Taamaattumik taanna isumaqatigiissut taavalu aamma suleqatigiinnissarput suli ineriartortoq, allanngornissaa aarlerinngilara, Steen Lynge KNR-imut oqarpoq.
Donald Trump perulluliornernut iliuutsini pillugit isornartorsiorneqangaarpoq.
Steen Lynge naapertorlugu Donald Trumpip inoqatinut attaveqatigiittarfitsigut nalunaarutai imminnut assortorput, tamat oqartussaaneranillu illersuerusunnini takutissimasorinngilaa.
Tassami Lynge isigininninnera naapertorlugu Trump marloqiusamik oqaluttooq, siullermik eqissisaalluni:
- Tassunga atatillugu suli ajugaanissaraluaminik eqqunngitsumik pineqarnini ilaatigut oqariartuutigivaa taannalu takullugu malunnarpoq qanoq uku assigiinngitsiginersut taavalu immikkoortigisut massakkut præsidentiusuoq præsidentinngortussarlu, Steen Lynge oqarpoq.
Perulluliornerit kinguninngua Joe Biden USA-mi præsidentissatut Kongressimi akuerineqarpoq januaarillu ulluisa 20-ani Amerikami præsidentitut ivertinneqassalluni.
