Nunani tamalaani politikerit: USA-mi pisut annilaarnarput
Trumpimut tapersersuisut USA-mi Kongressip illorsuanut aalassaqalutik pingasunngornermi unnukkut isaaneranni toqqaannartumik aallakaatitsineq nunarsuaq tamakkerlugu malinnaaffigineqarpoq.
Trumpimut tapersersuisut demokratip Joe Bidenip USA-mi præsidentinngornissaanik Kongressip akuersileruttornerani taamaaliorput.
AAMMA ATUARUK Washingtonimi eqqissiviilliortoqarnerani inuit sisamat ajunaartut
Kongressimili ilaasortat inuillu allat Kongressip illorsuaniittut akerliussutsimik takutitsisunit nigorniarlutik toqqortariaqarsimapput, taavalu politiit nakkutilliisullu tunuartariaqarsimallutik.
Inuit sisamat taama pisoqarneranit toqupput, inuppaaluillu allat aamma politiit aqqunartiterlutik.
Merkel: Tunuarninni pissaanermik tunniussinera naammaannassaaq
Præsident Trumpip akerliussutsimik takutitsisut tapersersorpai, nunanilu tamalaani naalakkersuisut politikerillu pisut assuaraat.
Danskit ministeriunerat Mette Frederiksen (S) Twitterimi ima allappoq:
- Ingasattajaarneq, persuttaaneq, avissaartuuneq uivernerlu aqqutissaanngisaannarput. Washingtonimiit assit annilaarnartut. Tamat oqartussaanerattoruna atuuteqqilerli.
Danskit nunanut allanut ministeriat Jeppe Kofod (S) Ritzaumut ima oqarpoq:
- Nakuuserluni perulluliorlunilu akerliussutsimik takutitsinermut assuarinnittut tamaasa, soorlu Joe Biden, tapersersorpakka. Pisut iliuuseqarfigiumaaraat neriuutigisupilussuuara.
Taassumalu Amerikami pisut USA-p Danmarkimi aallartitaanut, Carla Sandsimut, aamma ernumaammernartorujussuunerarpai.
Ukioq manna tunuaruni assinganik pisoqarnavianngitsoq, Tysklandip kansleriata Angela Merkelip neriorsuutigaa.
- Neriorsorpakkit kansleritut tunuarnera naammaannartuussasoq.
Frankrigip præsidentiata, Emmanuel Macrónip, USA-mi perulluliornerit Twitterimi allalluni aamma iluaaginerarpai.
- Tamat oqartussaaqataanerat upperaarput, taanna allappoq.