Professor: Issittumi Siunnersuisoqatigiit avatangiiseq pillugu inatsisioliornianngillat

Laplandip ilisimatusarfiani Issittumut professorip Lasse Heininenip, Issittumi Siunnersuisoqatigiit ineriartornerat pikkuginngilaa.
Taassuma isaani Issittumi Siunnersuisoqatigiinni nunat ilaasortaasut Issittup aningaasatigut iluanaarniutiginissaa soqutigineruaat, tamaani isumannaallisaaneq eqqissinissarlu - tamanut atuuttussaq pinnagu. Issittumimi Siunnersuisoqatigiit 1996-imi pilersinneqarmat siunertaasimagaluarpoq:

- Ingerlariaasaat pakatsissutigilaarpara. Ukiuni qulini siullerni siuariartupilooraluarput, nunalli sulinerat arriillivoq nangaasoorpullu. Ajornartorsiut uaniippoq, nalunaarusiat pilersaarutillu suliarineqarsimasut maanna atuuttussanngortinneqartussaagaluarput. Taamatulli pisoqanngitsoq, professori isumaqarpoq.

Avatangiisinut malittarisassaqanngilaq

- Nunarsuup issittortaa ullumikkut qiviaraanni, takujuminaappoq piujuaannartitsinissaq imaluunniit pinngortitamik illersuisoqarnera, soorlu avatangiisit pillugit sukannernerusunik malittarisassaliornertigut. Naak ilisimagaluaripput ullutsinni annertunerusumik pinngortitaq atorneqartoq.

Taarsiullugu nunat assigiinngitsut aningaasanik aqutsinerat sammisanngorsimavoq. Issittumi suliniutinit iluanaarutaasinnaasut Issittumi Siunnersuisoqatigiinni nunanut ilaasortaasunut tamanut pingaaruteqalersimapput.

Aningaasanik aqutsineq pingaarnerulersimavoq
- Namminneq aningaasanik aqutsinerannut pingaarnerulersimavoq. Soorlu suliffeqarfinni naalagaaffinnit pigineqartuni.  Sunniiniartartunik pissaanilerujussuarnik sulisoqartarput, naalakkersullu tamakkunangannga kimigiiserfigineqartarput. Soorunami toqqaannartumik nunanut iluaqutissaqartarpoq. Peqqutaaqataappulli Issittup ataatsimoortumik nukittumillu illersorneqarnissaanik unitsitsitsisutut, professor Lassi Heininen oqarpoq.

Professori naapertorlugu nunarsuarmut tamarmut atuuttumik pinngortitamik illersuinermiit aningaasarsiorfittut ingerlalersimavoq. Issittumi naalagaaffinni sunniiniat suliffissuaqarfinneersut ima pissaaneqartigaat allaat politikerit pinngortitamik illersuinissaq tunuttarlugu nangaaffigisarluguluunniit.

Piffissarli ungasinnerusoq isigalugu Issittumi Siunnersuisoqatigiinni ilaasortaasut Issttumi tamarmi sukannersumik pinngortitamik mianerinnittut annertunerpaamik iluanaassasut, Lassi Heininen isumaqarpoq. Aallaqqaammut aningaasarsiornikkut kinguneqaqqaassaaq. Taavali suliffeqarfiit Issittumi allanik avatangiisinut ulorianannginnerusunik aningaasarsiuutaasinnaasunik nassaarsiussasut taanna isumaqarpoq.