Prins Henrik appaliarsunngersuuvoq
Kalaallit Nunaannut asanninnerujussuaq Prins Henriup eqqaamaneqassutigaa. Taassumalumi nunarput arlaleriarluni tikeraartarsimavaa.
Allattoq Jonas Fievé, Ane-Marie Petersen
februaarip 15-at 2018 10:43
Rigsombudsmandip arlaleriarluni Prins Henrik naapittarsimavaa taassumalu taama eqqaamasaqarfigaa.
- Qanilaartutut, uummarissutut, soqutiginnittutut pimoorussisutullu eqqaamavara, Rigsombudsmandi Mikaela Engell oqarpoq.
Taassuma Dronning Margrethe uialu Prins Henrik namminersornerullutik oqartussat nalaanni nunanut allanut tunngasunut pisortaagallarami Narsarsuarmi naapeqqaarpai.
AAMMA ATUARUK Kissalaartumik tikilluaqquneqartarnertik puigunngisaannarpaat
2011-imilu 2015-imilu kunngikkormiut aasaanerani angalaneranni angalaqataavoq. Tassanilu Prins Henriup Kalaallit Nunaannut asanninnerujussua takusimavaa.
- Prinsi Kalaallit Nunaannut soqutiginnittorujussuuvoq nuannarinnittorujussuullunilu. Kalaallit eqqumiitsuliaat, sanalugaat, nerisassaataalli. Ingappoq nerisassannut assut soqutiginnillunilu misileerusuttarnera.
Appaliarsuit mamarai
Prins Henriullumi nunatsinnut asanninnerujussua Mikaela Engellip arlaleriarluni takusarsimavaa.
2011-imi angalanerminni Siorapalummiitillutik kunngikkut appaliarsummik puisip orsuanik seernassakkamik misiliitinneqarnera eqqaamalluarpaa.
- Anisariaqarsimavunga uannut sakkortuallaalaarmat, Dronningi malitsiaannaq aamma anillappoq oqarlunilu "tassa misilereerpakka!". Prins Henriullu qanoq mamaqarluartiginera eqqartuinnaleraluarpaa, Mikaela Engell illalaajutigaluni oqaluttuarpoq.
AAMMA ATUARUK Prins Henrik katerisimaarfiusumik iligallarneqassaaq
