Joe Biden uppernarsaavoq: Præsidentimut aappaagu qinersinissami qinigassanngorteqqissaanga

Præsidentimut aappaagu 2024-mi qinersinissami qinigassanngorteqqinniarluni, USA-p maanna præsidentia Joe Biden nalunaarpoq.

Joe Biden USA-mi demokratit sinnerlugit præsidentimut aappaagu sassaqqinniarpoq.

Biden qineqqusaarnissaminut atatillugu videoliami taama nalunaaruteqartoq, nutaarsiassaqartitsivik Reuters allappoq.

Bidenip præsidentimut aappaagumut qinigassanngorteqqinniarnini apriilimi siusinnerusukkut oqaluttuarererpaa, qinigassanngortinnerali pisortatigoortumik maanna nalunaarutigineqarluni.

Biden 80-inik maanna ukiulik USA-mi maannamut præsidentiusimasuni utoqqaanersaavoq. Biden præsidentitut qinigaaqqissappat ivertinneqarnermi 82-ileereersimasssaaq, præsidentiuneralu naammassippat 86-ileereersimassalluni.

Ukioqqortuneralu arlaleriarluni oqallisaavoq, qinersisartullu akornanni ilaatigut aamma ernummatigineqarluni.

Nutaarsiassaqartitsivik NBC News qinersisartunik sapaatit akunnerata naanerani isumasiuimmat, apersorneqartut akornanni 70 procentit akipput Joe Biden præsidentimut sassaqqittariaqanngitsoq.

Apersorneqartut 69 procentii isumaqarput, Bidenip ukioqqortunera apeqquserneqarsinnaasoq.