Joe Biden 2024-mi qineqqusaarnissamut sassaqqinniarpoq
USA-p præsidentia Joe Biden ippassaq tallimanngormat avammut nalunaarpoq 2024-mi præsidentimut qineqqusaartoqaqqilerpat sassaqqinniarluni.
Erseqqissaatigaalu qineqqusaarutissani qanittukkut avammut tusarliutissamaarini. Biden Irlandimut tikeraareernermi kingunitsianngua taama avammut nalunaarpoq, sapaatimmi akunnera una qaangiuttoq Irlandimut Irlandillu avannaanut tikeraarsimaarpoq Irlandip Tuluit Nunaannut avissaarneraniit ukiut 25-t qaangiunnerat pillugu malunnartitsinermi peqataareerluni. Avissaarnerlu taanna Langfredagsaftalenimik taaguuteqartinneqarpoq.
Præsidentilu ima ilaatigut oqarsimavoq:
- Qineqqusaarnissara qanittukkut iluamik saqqummiulluassavara. Angalanerma uuma qineqqusaarusuummertippaanga, Biden taama issuarneqarpoq.
Oqaatigineqarporlu Bidenip oqariaaseq una ilisarnaatigisaraa: ”Suliassaq naammassilluaqqaarneqassaaq”. Bidenimi aamma præsidentimut qineqqusaaqqaarnerminiilli politikkikkut anguniakkani arlallit ajugaaffigilluarpai, ilaatigut soorlu corona pileruttormat nualluussuup akiorneqarnissaanut atugassanik milliartinik taamannanik aningaasaliissuteqarsimanini eqqaamaneqaatigaa aammalu nunap ataqatigiinnermut attaveqaataanut soorlu angallannermut tunngasunut nutaamik aaqqiissuteqarnini nuannarineqaatigaa.
Qinigaaqqissagunili qinigaaffini taanna naappat taamanikkussamut 86-nik ukioqalersimassaaq. Tassalu imaappoq amerikami ukiutigut agguaqatigiissillugu utoqqaanerpaaffiusumiit ukiunik qulingiluanik utoqqaavallaalersimassaaq.
Amerikap præsidentiata illorsuata nakorsaata februaarimi naliliinermini oqarpoq, Biden imigassamik aalakoornartortalimmik imerneq ajortoq aammalu sapaatip akunneranut tallimariarluni timersortartoq USA-mi præsidentimut sassaqqinnissaminut piukkunaateqarluartoq.
